Sa makausa pa, ania na usab sa nasod ang grupo sa mga Amerikanhong basketbolista alang sa usa ka tour nga sugdan sa Sabado, Septiyembre 24 hangtod sa Oktubre 6 sa nagkalain laing dapit sa Visayas ug Mindanao.
Ang Sirius Star Pilipinas nga gilangkuban og mga magduduwa gikan sa Estados Unidos, Senegal, Nigeria mopahigayon sa ilang 4th Philippine Tour ubos sa paggiya sa Sugboanon ug inilang coach nga si Albert Abuyador Alocillo.
Unang mopakita og aksiyon ang Sirius Star didto sa Tagum City sa Davao del Norte diin pasunod nilang ikasangka ang Larry Y. Rubinos team, Holy Cross College ug Montana Pawnshop.
"We will be having clinic in the morning in Tagum City. About 200 kids are also waiting for us. This is actually part of their sports tourism. And on Monday ang City of Tagum i-tour mi sa ilang sports destination," matod ni Alocillo atol sa presscon sa Sunburst-Mango, Cebu City, Huwebes, Septiyembre 23, 2022.
Human sa ilang destinasyon sa Davao, ang team molupad paingon sa Bohol diin adto na usab sila mopahigayon og mga serya sa mga exhibition games.
Sa oktubre 6, turno na usab sa mga Sugboanon nga linawas nga makakita sa ilang duwa.
Ning higayona, ang grupo sa G-Sports nga gipangulohan ni Gerry Canonigo sa lungsod sa Minglanilla mao na usab ang magsilbing host sa maong grupo.
Gilaraw ni Canonigo nga posibling moporma sila og Minglanilla Selection o kaha ang Minglanilla Archangels maoy iyang isakbang batok sa Sirius Star.
Milangkub sa Sirius Star mao sial si Aaron Castro, 5-10, sa New Jersey, Dru Smith, 6-3, sa Kansas City NCAA Division 2, Anthony Winninghan nga nakaduwa usab sa Lincoln University sa NCAA 2, Kamaal Power, 6-1, sa Chicago Ilionoi.
Anaa usab sa team Martel Miller sa University of Indianapolis, DaJuan Allen, 6-1, sa Dayton, Ohio, Papa Alpha Gueye sa NBA Africa Senegal, ug ang kanhi import sa University of Southern Philippines-Foundation nga si Rich Onyeka Managor sa Nigeria.
Si Lyndon Colina ang kanhi sakop sa USPF kinsa nakuha sa San Miguel sa niagin drafting sa PBA ang maoy bugtong Pinoy sa grupo.
Gibutyag ni Alocillo nga gawas ni Winninghan kinsa iyang kaabin sa pagmugna niining team, ang tanang mga sakop sa ikaupat nilang tour pulos gyud mga first timer.
Gibutyag ni Alocillo nga daghang mga interesado mga magduduwa sa US nga gustong moapil sa grupo ug niini naglaraw siya nga mohimog mas dako ug lapad nga tournament nga salmotan sa mga langyawng team sa Amerika.
Ang 4th Philippine Tour sa Sirius Star hugot nga gisuportahan sa Ball Up Sporting (BOS) nga atoa magbasehan sa US, AAA Basketball ni Alocillo ug ingon man ang CM Farm.
"One of the reason why I'm doing this is, ganahan ko maka contribute bitaw sa basketball development. Local coaches like me nakaabot gyud ko sa unahan ganahan lang ko mo share ba unsa ang mga philosophy and guidelines nga puwede nato ma share."