Duha ka mga suspek sa pagpanglugos nadakpan sa mga sakop sa Criminal Investigation Detection Group (CIDG) 7 sa managlahi nga mga dapit sa probinsiya sa Sugbo atol sa ilang pag-serve sa warrants of arrest sa Miyerkules sa buntag, Septiyembre 21,2022.
CARCAR
Si Police Major Nazareno Emia, pangulo sa CIDG Provincial Field UNit (PFU), nangulo sa hiniusang pwersa sa kapulisan sa pag-serve sa warrant batok kang Juan (dili tinuod ngalan), 48, taga Barangay Perrelos, Carcar City, habagatan sa lalawigan sa Sugbo.
Gitago ning mantalaan ang matuod nga ngalan sa suspek aron pagpanalipod sa dungog sa biktima nga iyang stepdaughter.
Si Emia nagkanayon nga kauban sa operasyon mao ang mga sakop sa Carcar City Police Station ug mga sakop sa 2nd Provincial Mobile Force Company (PMFC) sa Cebu Police Provincial Office (CPPO).
Nag-atubang si Juan og duha ka mga ihap sa kasong lugos, apan usa niini nitugot ang korte nga makapiyansa ang akusado sa kantidad nga P200,000.
Si Judge Joy Bracero Redoble sa Branch 77 sa Dakbayan sa Carcar maoy niluwat sa kamanduan nga dakpon si Juan.
Dugang ni Emia, ang pagpanglugos nahitabo sa Oktubre sa milabay nga tuig. Ang biktima mao ang anak sa kaipon niini nga usa ka person with disability (PWD) nga giingong gipahimuslan sulod sa ilang panimalay.
Ang biktima nisumbong sa iyang lehitimo nga amahan nga maoy hinungdan nga nipasaka og reklamo batok sa suspek nga iyang stepfather.
CONSOLACION
Laing gidakop pinaagi sa warrant sa korte sa kasong lugos giila sa kapulisan nga si Mario Baquelta, 29, taga Barangay Jugan, Consolacion sa amihanang bahin sa lalawigan sa Sugbo.
Si Police Lieutenant Colonel Hector Amancia, pangulo sa CIDG Cebu City Field Unit, maoy nangulo sa team sa pagsikop kang Baquelta uban sa mga personnel sa Regional Intelligence Unit (RIU)-7.
Matod ni Amancia, si Judge Hon. Esther Veloso sa Branch 6 sa Regional Trial Court maoy niluwat sa warrant of arrest nga pinetsahan og Marso 6, 2020.
Nasayran nga ang biktima nga katabang sa panimalay sa higala sa suspek giubanan sa kapulisan sa Mabolo Police Station sa pagpasaka og kaso batok kang Baquelta.
Dason ni Amancia, ang suspek nisibat human nasayod nga gipasakaan og kaso apan natultolan sa mga pulis.
Hinuon, ang suspek niangkon nga nahimo niya kini sa panahon nga siya hubog apan nihimakak nga iyang gipugos ang biktima nga hamtong na.
Ang CIDG 7 nihulagway nga si Juan anaa sa no. 7 most wanted person samtang, si Baquelta maoy no. 1 nga most wanted person sa probinsiya sa Sugbo.