Environmental advocate groups ningrekomendar ngadto sa Cebu City Government nga sugdan na ang pagsulbad sa problema sa basura sa lebel sa panimalay kay sa magtukod og waste-to-energy (WTE) facility sa dakbayan.
Si Joselito Vasquez, Visayas ug Mindanao coordinator sa Piglas Pilipinas ug Philippine Movement for Climate Justice, niingon sa SunStar Cebu Huwebes, Sept. 22, 2022, nga ang WTE nga mga pasilidad dunay di maayong nga epekto sa kalikupan ug panglawas sa publiko.
Niadtong Huwebes, gipirmahan ni Mayor Michael Rama ang notice to award sa New Sky Energy Philippines alang sa katukoran sa P4.8 bilyunes nga WTE facility nga mosunog sa basura aron makamugna og kuryente.
Matod ni Vasquez nga sa pagtuon nga gihimo ni Dr. Jorge Emmanuel sa Siliman University nagbutyag nga ang mga pasilidad sama sa WTE nga mosunog sa mga basura mahimong hinungdan sa mga problema sa panglawas sama sa cancer.
Dugang pa niya nga ang maong pagtuon gipresentar ngadto sa Cebu City Government atol sa waste summit nga gipahigayon niadtong Abril 2022 apan ang mga findings wala lang tagda.
Matud ni Vasquez nga ilang giawhag ang City Government nga higpit nga ipatuman ang Republic Act 9003 o ang Ecological Solid Waste Management Act of 2000.
“If we strictly apply the law and capacitate the barangays... ang waste unta nga mo gawas sa barangay kato na lang mga residual waste,” matud ni Vasquez.
Matud pa ni Vasquez nga kinahanglang i-require sa Kagamhanan sa Dakbayan ang tanang barangay nga adunay kaugalingong material recovery facility aron makatabang sa pagkunhod sa mga basura nga gilabay sa dump site.
Gisaway usab niya ang kapabilidad sa pasilidad sa WTE nga makagama og igong kuryente tungod sa moisture content sa basura.
Sa laing bahin, ang EcoWaste Coalition mipadayag usab sa ilang pagkadismaya sa pagpirma sa kontrata alang sa pasilidad sa WTE.
Ang national coordinator sa EcoWaste Coalition nga si Aileen Lucero niingon sa usa ka pamahayag nga ang maong deal nakadaot sa mga paningkamot sa mga residente sa dakbayan sa Sugbo sa pagpamenos ug pagpakunhod sa ilang basura.
“Mayor Rama’s approval and signing of a 40-year agreement with a garbage incinerator company undermine citizens’ effort to minimize and reduce their waste while locking in the city to a very long tenure of dirty and expensive waste management system,” matud ni Lucero.
Si Paeng Lopez, program manager sa Health Care Without Harm, niingon usab nga ang mga incinerator nga nagtakuban isip mga pasilidad sa WTE nagpagawas og makahilong mga hugaw sama sa dioxin, lead, ug mercury ngadto sa kinaiyahan.