Giawhag sa Land Transportation Franchising and Regulatory Board (LTFRB-7) ang mga Transport Service Cooperative sa pag-renew sa ilang Certificate of Good Standing (CGS) sa Office of Transport Cooperative (OTC).
Si LTFRB 7 Director Eduardo Montealto Jr. nagkanayon kagahapon, Septiyembre 23, 2022, nga sa 69 ka mga kooperatiba, tulo pa niini ang naka-renew sa ilang CGS base sa suwat nga gipada sa OTC penetsahan niadtong Septiyembre 20, 2022.
Ang pangulo sa LTFRB-7 nagkanayon nga kinahanglang maka-renew ang mga transport cooperative aron dili malangan kon aduna silay transaksyon sa ilang buhatan sanglit base sa ilang polisiya dili atimanon ang ilang mga dokumento kon walay CGS nga mapresentar.
“We would like to urge all Transport Service Cooperative (TSC) to renew their Certificate of Good Standing (CGS) with the Office of Transport Cooperative (OTC). This office will only entertain duly accredited transport cooperative with valid Certificate of Good Standing,” tipik sa pamahayag ni Montealto nga gi-post sa LTFRB-7 Facebook page.
Lakip sa mga naka-renew na sa ilang CGS mao ang Cebu Mepza Liloan Drivers and Operators Transport Cooperative, Loboc Operators Transport Cooperative ug United Drivers and Operators Transport Cooperative diin mo-expire ang ilang CGS karong Hunyo 30, 2023.
“Ang good standing pabor na nila kay tan-awon na sa OTC og maayo ba ilang financial management. Kon okay gani tagaan sila og CGS unya ang magsubmit gamay ra man,” padayag ni Montealto.
Gipasabot sa pangulo sa LTFRB-7 nga ang wala pa maka-renew, posible nga wala pa ma-expire ang ilang CGS ug ilang gituyo nga ipahibalo kini sa publiko para mapahimangnoan usab ang mga kooperatiba.
Ang pagkuha og CGS gikan sa OTC libre ug, matod ni Montealto, online ang paagi sa submiter ug dali ra usab maatiman ang ilang request.