Nakadayeg kaayo ko ni Mayor Michael Rama basta paghawan na sa kadalanan ang hisgutan. Sa tanan sab nga mayor, siya ra ang naminaw namo nga bikers busa, sa iyang termino napasar ang bike lane ordinance.
Maayo unta kon ang mayor todo back-up kang manlalaban Gerry Carillo, pinaagi sa pagmando sa mga pulis ug traffic enforcers, sa pagpanakop sa mga malapason sa ordinansa kada adlaw. Modulot na madugayan basta di lang palab-anan, di sama adtong gihimo ni kanhi mayor Tomas Osmeña sa pag-impound sa mga sakyanan, kansang drivers nakalapas sa balaud sa trapiko.
Kon pasabton ug di arogante ang approach sa mga manakupay, magkadugay, makasabot ug makadayeg pa ang katawhan kay di man ni kaayuhan ra sa pipila, kon di sa kinabag-an.
Maanindot ning lakang ni Rama sa paghawan sa mga sidewalk sa siyudad. Tinuod, ang mga tawo anha na mangagi sa karsada kay wa na may sidewalk nga maagian. Sama sa habig sa Brgy. Apas sa Banilad road kun dan Gov. M. Cuenco.
Sa kaniadto mag bike pa ko kada adlaw, magbantay ko sa mga tawo nga mokalit lang sa pagtikang sa karsada. Kanang duol sa Country Mall nga pundok sa kabalayan daghang mga tawo nga manglakaw diha sa daplin sa dalan, gikan sa may sityo Baca lahos na ngadto sa may access road sa IT Park.
Kon mabawi sa Siyudad ang sidewalk nga mga 2 meters lang, ang mga nagpuyo sa Banilad ug Apas mahimo rang maglakaw padung sa IT Park kay naa na may sidewalk nga luwas nga malakwan.
KUYAW
Usa sa mga rason nganong tapulan ang mga tawo nga molakaw mao ang kabati sa accessibility sa atoang mga sidewalk. Daghan na kaayo ang nang encroach nga structures nga hangtod karon wa gihapon mahawan.
Kuyaw kaayo nga maglakaw sa daplin sa karsada kay makigpatentero ka sa mga sakyanan kay di maagian ang sidewalk o kompletong way sidewalk.
Dunay mga tag-iya og structures nga naghimo og extension sa way paghuna-huna nga nakahasol sa publiko. Unya kon moabot na ang panahon nga ipa demolish sa kagamhanan, ang public officials na ang dautan.
Apan kon di lang selfish ang paglantaw sa ubang mga lumolupyo sa siyudad, maanindot unta kaayo ang kadalanan kay dunay mga sidewalk nga luwas nga lakwan sa katawhan.
LAKAW, TINDAK
Kon ipadayon lang sa Mandaue ug Cebu City ang plano sa paghawan ug paghimo og trail sa daplin sa Butuanon River, gikan sa bukana sa sapa lahos na ngadto sa ibabaw nga bahin sa sapa habig sa Cebu City, maanindot kaayo kini.
Mahimo kining dapit diin mahimong lakwan, jogging ug magbiseklita. Sa ubang mga nasod sa Europe, hawan ang daplin sa ilang kasapaan, diin dunay mga tindahan nga mahimong maimnan og kape ug makan-an.
Kaanindot kon dunay portion nga daplin sa kasapaan nga ingon niana ang talan-awon. Inay mga basura ang nagdaghan, mga dapit unta diin ka maka relax. Mahimo baya ni, apan di diha-diha sa usa lang ka pamilok. Kinahanglan usab nga suportahan sa katawhan.