Gihingusgan karon sa Office for Senior Citizens Affairs (Osca) sa dakbayan sa Sugbo ang “paglimpiyo” sa mga sakop aron mawagtang ang mga tiguwang nga patay na apan nalakip gihapon sa listahan sa mga benepisyaryo sa hinabang pinansyal.
Ang pangulo sa Osca nga si Vicente “Inting” Esmeña niingon nga ang mga kawani sa City Hall nagpahigayon na karon og inspeksyon sa matag barangay aron masuta kon buhi pa ba ang senior citizen o patay na.
“Atoa gi tagaan og master list sa senior citizen kada barangay. Mao na ilang gi trabaho karon, giuna nato na kay hapit na raba ta manghatag (financial assistance)... i-cleansing gyud per barangay. Patay, patay gyud,” matod ni Esmeña.
Ang giingong “dead claimants” sa senior citizen financial assistance nakamugna og kontrobersiya sa miaging mga buwan nga maoy nakaaghat ni Mayor Michael Rama sa paghulga sa mga hingtungdang opisyal sa gobyerno nga posibleng ma-terminate.
Matod ni Esmeñe, gihatagan nila og duha ka semana ang validators aron hingpit nga malimpyohan ang listahan sa mga senior citizen gikan sa mga dili kuwalipikadong benepisyaryo.