Giingong kalag sa duha ka managsuong mga bata giingong ningsulod sa lawas sa pito ka mga tinun-an sa Carcar National High School sa dakbayan sa Carcar alas 7:00 sa gabii sa Biyernes, Septiyembre 23, 2022.
Ang hitabo ikaduha na diay kay niadtong Huwebes, dunay laing grupo sa mga tinun-an nga giingong gisudlan og espiritu nga ila usab nga gitabang.
Si Police Lt. Col. Ardeolito Cabagnot, hepe sa Carcar Police Station nga nahinabi sa Superbalita Cebu, nagkanayon nga pito ka mga tinun-an sa 3rd year high school pulos mga babaye ang giingong nasudlan sa espiritu.
Ang mga tinun-an padulong na unta mopauli gikan sa ilang classroom sa likod sa tunghaan.
Apan giingong nasudlan og espiritu ang duha ka mga classmate unya ningsunod ang laing lima.
Ang mga tinun-an kalit nga ningsinggit, nangisog ug giingong ninglitok og mga pulong nga Latin.
Ang mga pulis ug mga magtutudlo nagtinabangay sa pagkupot sa mga bata nga gihulagway nga kusgan kaayo bisag lima ka mga tawo ang ningkupot, naglisod sa pagpiog.
Ang duha ka mga tinun-an nga unang giingon nga na possessed gidala sa Saint Catherine of Alexandria church uban sa mga pari, magtutudlo, kapulisan ug mga pari nga dunay kaalam kabahin sa exorcism.
“Nagtubagtubag ning duha, tinun-an daw managsuong kalag, nangita sa usag-usa kon asa siya. Unya sagol ni-latin, isug kaayo,” dugang ni Cabagnot.
IKADUHA NA
Gibutyag niya nga ikaduha na kining nahitabo sa maong tunghaan kay niadtong Huwebes sa hapon, lima sab ka mga tinun-an ang giingong nasudlan og dautang espiritu.
Apan wala kini ma-report sa buhatan sa kapulisan.
Si Cabagnot nitug-an nga usa ka sakop niya nga pulis nga diha nagtungha kaniadto nibutyag nga sa una duna say nahitabo nga gisudlan sa espiritu ang mga estudyante.
Kini tungod sa ka daghang dagkong mga kahoy nga acasia sa dapit. Nahibaw-an nila ang maong dapit gihimong garrison sa mga sundawong Hapon sa Ikaduhang Gubat sa Kalibutan.
Hinungdan nga dili masalikway sa kapulisan ang posibilidad nga dunay mga kalag nga wala nahimutang.
“Basin biktima ni sila kaniadto sa krimen, unya nagkinahanglan sa atong pag-ampo, pamisa kay wala mahimutang ilang kalag,” sumala ni Cabagnot.
Gibutyag niya nga dunay mga estorya sa eskwelahan nga ang mga bata naka-experience lang og mass hysteria tungod kay kulang sa tulog, napasmo, nagsige og duwa sa cell phone.
Matod niya nga ang mga hitabo walay kalambigitan sa pagpatuman sa face-to-face classes.
Gipadayag ni Cabagnot nga hayan ang nahitabo sa duha ka nagsunod nga mga adlaw psychological effect lang sa mga bata busa nagkadungan ang mga hitabo.
Ang mga tagdumala sa tunghaan, security ug kapulisan nagtambayayong aron ilang bantayan ang mga tinun-an pagbukas sa klase.
Kini aron usab dali nila maaksyunan kon simbako duna na usay samang hitabo.