Human sa duha ka mga tuig nga nahunong ang mga kalihokan sa selebrasyon sa kapiyestahan sa Barangay Tisa, mibalik kini karong tuiga alang sa ika-9 nga tuig nga selebrasyon sa Siomai Festival.
Niadtong Septiyembre 15, dihang gibuksan ang nagkadaiyang mga kalihokan sa Siomai Festival pinaagi sa opening salvo ug prosesyon sa patron sa barangay nga si San Lorenzo Ruiz.
Lakip sa mga kalihokan ang Parish Night, Zumba, Barangay Night, School Night, Dance Battle, Tisa Idol 2022, Bisrock/Musicale, Queen of Tisa 2022 Pahugyaw Edition, ug Miss Tisa 2022.
Gawas niini labing unang gilusad karong tuiga ang Tisa Food Park sa dan F. Llamas sa Atlantic Property diin nagkadaiyang mga pagkaon, mainom, ug uban pa, ang mamahimong mapalit.
Nagpabilin usab ang naandan nga mga baligya sa kilid mismo sa kadalanan sa Tisa diin milungtad kini og 10 ka adlaw.
Karong gabii, ang gipaabot sa tanan nga street party, mobalik na usab diin maglingaw-lingaw ang tanan inubanan sa responsable nga pag-party karon nga gibuksan na ang Sugbo human sa pipila ka mga tuig nga nahunong ang tanan tungod sa COVID-19.
“Malipayon kaayo kita nga human sa duha ka tuig nga wala kita makapahigayon sa Siomai Festival, mibalik kini karon nga mas mabulokon ug mas bukas dili lang alang sa Tisa apan lakip na usab sa atong mga bisita,” matod ni Barangay Tisa Captain Renato “Ringo” I. Pacaña.
Mas engrande nga selebrasyon ang paabuton sa mga Tisaanon alang sa umaabot nga ika-10 nga tuig nga selebrasyon sa Siomai Festival sunod tuig.
“Kining atong gibuhat karong tuiga, mamahimo nga pagpangandam sa pagbalik usab sa Siomai Festival Street Dance sunod tuig atol sa ika-10 nga tuig sa Siomai Festival,” dugang ni Pacaña.
Mapasalamaton usab si Pacaña sa tanang nagpaluyo niining malampuson nga selebrasyon lakip na ang barangay council, SK, barangay staff, sponsors, volunteers, partners, ug labaw sa tanan ni San Lorenzo Ruiz!