Nitaliwan na sa laing kalibutan si Bokal Horacio “Raci” Franco sa ikaupat nga distrito sa lalawigan sa Sugbo sa Septiyembre 23, 2022.
Kini maoy gikompirmar ni Daanbantayan Mayor Sun Shimura nga sakop sa 4th district.
“Yes... Board Member Raci Franco passed last night around 11pm,” pinaagi sa text message sa Superbalita Cebu.
Subay niini, mipadangat sa mga pahasubo ang kagamhanan sa probinsya sa Sugbo ug kaubanan niining opisyal ngadto sa pamilya ni Franco sa hitabo.
“The officials and employees of the Cebu Provincial Government wish his family strength and comfort during this time of grief,” asoy sa statement sa Cebu Provincial Capitol pinaagi sa Sugbo News.
Gihulagway sa Kapitolyo kon unsa nga klase sa public servant si Franco diin nahinumdoman niini ang iyang kakugi.
“Board Raci was a great loss to the constituents of Fourth District of Cebu and the rest of the Cebuanos...” dugang sa pamahayag.
Mipadangat usab og pahasubo si Bise Gobernador Hilario Davide III.
“Raci was a loyal friend and ally. He was a hardworking and dedicated public servant, who did his utmost to his constituents in the Fourth District. His kindness and good deeds shall stay forever....” saysay ni Davide pinaagi sa giluwatang pamahayag sa official page niini.
Si Franco nagsilbing bokal sa 4th district sulod sa pito ka katuigan sukad sa 2016.
Siya maoy chairman sa committee on ways and means sa Hunta Probinsyal.
Pipila na ka higayon nga wala makatambong sa regular nga session si Franco nga ipahigayon sa Hunta Probinsyal matag Lunes.
Nahimo usab siya nga konsehal sa lungsod sa Medellin sa 2001 hangtod 2007 ug 2010 hangtod sa 2016.
Ning uwahi, wala pay tino ug kompirmasyon gikan sa pamilya ni Bokal Franco kalabot sa hinungdan sa kamatayon niini.