DAKONG kalipay sa pasahero human nauli ang nahibilin niyang selpon sa drayber sa gisakyang traysikel sa Panabo City, Davao del Norte.

Sa post sa Facebook ni Zel Aguanta, gibutyag niya nga nahibilin ang selpon sa iyang manghod alas 11 sa buntag niadtong Biyernes sa traysikel nga gisakyan niini padulong sa 7/11 sa siyudad.

Matud pa nga ang selpon nahagbong gikan sa bulsa sa pantalon sa manghod ni Aguanta ug wa na magtuo ang pamilya nga mauli pa kini.

Apan giingon nga pagkagabii dihang gisulayan pagtawag sa amahan ni Aguanta ang numero sa selpon, gitubag dayon sa drayber sa traysikel kinsa ginganlan og Onyok Andico nga taga Brgy. Licanan sa siyudad.

Nagkasinabot gilayon ang amahan ni Aguanta ug si Andico nga magkita pagka-adlaw'ng Sabado aron nga mauli ang selpon.

Ug suma sa nasabutan, nagkita ang pamilya Aguanta ug si Andico sa sentrong bahin sa siyudad ug nauli ang selpon.

Dako ang pagpasalamat sa pamilya Aguanta ngadto kang Andico sanglit wa sila magtuo nga sa panahon sa krisis duna pay maayong tawo nga sama kang Andico nga buotan ug matinud-anon.