NAGMALAMPUSON ang gipahigayong duha ka adlaw sa Bay Deep Mati Freediving Festival gikan Septyembre 23-24 sa Mati City.
Sa unang adlaw sa freediving activity, gihimo sa mga freedivers ang underwater photography ug video workshop ug sa ikaduhang adlaw gihimo ang freediving sa Waniban Island, scuba diving sa Oak Island ug sa Michelle's Garden sa Mayo Bay.
Anaa sa 19 ka mga freedivers gikan sa lain-laing lugar sulod ug gawas sa nasud ang miapil sa freediving.
Sa pagtapos sa freediving gipahigayon ang kick-off party alang sa tanang mga partisipante kauban ang mga VIP nga mga bisita sa Bay Deep Mati Oriental Prince Hotel.
Diin sila personal nga gi-welcome nila ni City Mayor Michelle Nakpil Rabat, Governor Corazon Malanyaon nga maoy nagpasiugda sa nahitabong kick-off party ug DOT Regional Director Tanya Rabat Tan.
Usa sa highlight sa kick-off party ang paghatag og mensahe ni Asia’s freediving godfather ug former freediving record holder nga si Jean Pol Francois.
Ang Bay Deep Mati Freediving Festival ang pinakaunang government-initiated freediving event sa tibuok Pilipinas.
Dako usab ang pasalamat sa lokal nga kagamhanan ilabi na sa City Tourism and Promitions Office sa maayong mga komento nga gihatag sa mga international ug national participants kabahin sa kanindot sa kadagatan sa Mati City.
Dungan nga milaum ang Mati City LGU sa padayong paglambo sa turismo sa syudad ug gisigurado nga ampingan ang kadagatan pinaagi sa kooperasyon sa katawhan. (Uban sa taho sa Mati CIO)