Trese anyos nga batang lalaki gikatakdang operahan karong adlawa, Septiyembre 26, 2022 aron kuhaon ang pillets nga bala sa airgun nga nitaroy sa iyang ulo sa pagpusil kaniya sa suspek nga 16 anyos.
Matod ni Police Corporal Clifford Lerio sa Talisay City Police Station, nahitabo kini alas 9:30 sa gabii sa Biyernes, Septiyembre 23, 2022, sa Purok Sambag, Barangay San Roque, dakbayan sa Talisay.
Sumala ni Lerio, si Michael (dili tinuod ngalan), 13, nagkuyog sa iyang mga amigo nga nanguha og isda sa usa ka fishpond sa nahisgutang lugar.
Nasayran nga kini subay sa testimoniya sa maong bata nga biktima nga usa ka laing menor de edad ang niabot nga si Daryl (ngan gipugngan), 16, niduol kang Michael nagbitbit og airgun nga 22 riffle ug gipusil kini ug naigo sa likod sa ulo.
Daling miuli ang bata ug nisumbong sa inahan, apan sa Sabado sa buntag, Septiyembre 24, 2022 nadala ang bata sa tambalanan.
Sumala sa kapulisan, alas 2:30 sa hapon sa Sabado, ang ginikanan sa 13 anyos uban sa biktima, nisumbong sa kapulisan sa dakbayan sa Talisay hangtud nga na-rescue ang suspek nga menor sa pagka alas 6:00 sa gabii human nakompleto ang pagkuha og detalye sa mga nakasaksi.
Dungan sa pag-rescue sa 16 anyos nga suspek gitahan usab niini ang airgun nga iyang gamit.
Matod ni Lerio, ang suspek naa sa kustodiya sa Gender and Development (GAD) focal person sa ilang barangay.
Pag-angkon sa suspek ngadto na sa mga pulis nga iya kining gipusil kay nisulod sa ilang fishpond nga way pananghid.
Hangtud ning pagsuwat, nagtaroy pa ang bala sa ulo sa bata nga biktima.
Gipahibalo usab ni Lerio nga ang ginikanan sa 13 anyos dili na mopadayon sa pagpasaka og kaso batok na sa 16 anyos ug nakigsabot sa ginikanan sa bata nga maoy moabaga sa galastuhon sa pagpaopera sa bata