Ang Barangay Santo Niño, bisan layo sa kuyaw nga mga dapit sa Dakbayan sa Sugbo, naneguro sa pag-umol ug pagbansay og barangay responders.
Busa, sa mga katalagman ug emerhensya sa Cebu City, ang barangay usa sa mga mag-una sa pagtubag kanunay, sama sa mga sunog ug landslide.
Gani, niadtong bagyong Odette sa Disyembre 2021, ang ilang barangay responders nag-una sa pagpanghawan sa kadalanan sa Cebu City nga nababagan sa mga debris.
Si Barangay Kapitan Lourdes Ramirez niingon nga mao kini ang adbokasiya sa iyang kapikas nga si kanhi barangay kapitan Pancho Ramirez nga maoy iyang gipulihan sa katungdanan niadtong 2018 human napili sa sunodsunod nga tulo ka mga termino.
Matod ni Ramirez, tungod sa ilang nahimo, ning tuiga giapil ang barangay sa pagsusi sa Department of the Interior and Local Government (DILG) aron pag-evaluate sa ilang disaster preparedness.
“Ang ako man gud husband he was the former barangay captain, ang iya gyud advocacy is about disaster. That’s why kompleto gyud ta sa mga disaster equipment diri. In fact, gipaapil ang atong barangay sa kadtong Seal of Good Governance sa Cebu City. Gi-evaluate ta sa DILG Manila then atong gi-present ang atong disaster equipment. So, we are that prepared. Ang ako sad mga anak, when it comes to volunteerism, naa pud sila kay ang akong mga anak mo-conduct man pud ni sila og awareness. Ang akong usa ka anak naa sa Eruf isip volunteer,” matod ni Kap Ramirez.
AWARDS
Ang barangay nakadawat usab og mga award, nagmatuod nga maayo ang pagpatuman sa mga programa, apil na ang pagsuporta sa Kagamhanan sa Dakbayan sa Sugbo.
Niadtong Mayo, nakadawat sila og pasidungog gikan sa Local Vaccination Operations Center kay sila ang labing taas og porsyento sa mga lumolupyo nga nabakunahan sa hingpit sa coronavirus disease 2019 (Covid-19) sa 80 ka mga barangay sa Cebu City.
Karong tuiga, first runner-up usab sila sa Lupong Tagapamayapa Incentives Awards samtang sa 2021 finalist usab sila niini.
Bisan sila naa sa kinapusoran sa Cebu City, ila usab nga nadawat ang Outstanding Barangay Achievement Awards ug tungod kay gideklarar nga drug-cleared barangay na ang Sto. Niño, nadawat usab nila ang Outstanding Badac Awards sa 2021.
Ang pagkab-ot sa drug-cleared di sayon tungod kay moagi kini sa paghashas sa Oversight Committee nga gilangkuban sa nagkadaiyang mga buhatan sa kagamhanan.
Matod ni Ramirez, pipila lang kini sa mga award nga nadawat sa barangay.
Iyang tinguha karon mao ang pagpamalit pa og dugang mga ekipo bisan kon duna na silay tanker, fire truck ug uban pa.
Ang paghatag og dental ug medikal nga serbisyo mao ang usa sa iyang gilantaw nga proyekto ingon man ang pagpabarog og solar lamps sa kadalanan sa ilang barangay.
Sa pagkakaron, nakamontar na sila og closed-circuit television (CCTV) camera sa kadalanan.
Lain nga padayon nga gipalambo ang ilang drainage system aron matibhangan ang suliran sa baha kay ang barangay usa sa mga daling bahaanan kon magbunok ang uwan.