Ang 51st Air Force Group Reserve ubos sa 5th Air Reserve Center sa Air Force Reserve Command of the Philippines nipasiugda sa labing unang ‘Lupad Sugbo’ – Concert for a Cause.

Ang maong kalihokan kabahin sa ilang socio-economic development aron makaabag niadtong mga nagkinahanglan.

Si Air Force Reserve Captain Gerard Paul Caballes nagkanayon nga namugna nila ang maong concert for a cause human nga ilang nasaksihan ang mga tunghaan sa isla sa Olango, sakop sa Lapu-Lapu nga nagusbat resulta sa Super Typhoon Odette (Rai) niadtong Disyembre 2021.

Ang mga tunghaan nga magsibling benepisaryo sa maong kalihokan mao ang Baring Elementary School, Tingo Elementary School ug Pangan-an Elementary School. Matod pa ni Caballes nga 100 porsento nga kitaon sa concert ilang bahinon alang sa repair sa nahisgutang tulo ka mga tunghaan.

Ang ‘Lupad Sugbo’ concert ipahigayon sa Oktubre 1, 2022 nga sugdan sa alas 3:00 sa hapon hangtod na motapos ang katapusang banda.

Sa hawanan sa Valle Verde, Sta. Lucia Grounds (kilid sa tiilan sa Marcelo Fernan Bridge), Barangay Pusok, Lapu-Lapu City ang venue sa maong kalihokan nga gibana-bana nga hugpaan sa 6,000 ka mga concert goers.

Adunay 11 ka local performers sa Bisaya Rock (Bisrock) ug ubang genre sama sa reggae ug RnB diin ang main act mao si Noel Palomo, ang kanhi front man sa Siakol ug Repakol Band.

Tickets nagkantidad sa P300 – general admission, VIP – P500 ug VVIP – P2,000.

Alang sa dugang pangutana, mamahimong moduaw sa ilang Facebook page nga LUPAD SUGBO o motawag sa 09952893151 /09222137991.