Liboan ka mga pamilya ang natabangan human ang Department of Social Welfare and Development (DSWD) nanghatag sa ilang educational assistance sa mga tinun-an nga ubos sa Assistance to Individuals in Crisis Situation (AICS) program. Moabot sa 38,773 ka mga tinun-an sa Central Visayas ang nahatagan og ayuda sa DSWD sukad niadtong Agusto 20 ning tuiga.

Mosumada sa P104.7 milyones ang nahatag nga pundo alang sa mga tinun-an diin P30.61 milyones ang nahatag ngadto sa 10,488 ka mga tinun-an sa lalawigan sa Sugbo, P15.5 milyones alang sa 5,527 ka mga estudyante sa Negros Oriental, anaa sa P7.3 milyones sa 2,752 ka mga benepisyaryo sa Bohol ug P1.2 milyones sa Siquijor. Ang dakbayan sa Sugbo maoy labing daghan og benepisyaryo kay moabot sa 11,135 ka mga tinun-an diin gigahinan sila og P28.4 milyones dayon gisundan sa Lapu-Lapu City nga may 5,136 ka mga benepisyaryo, diin P13.3 milyones ang ilang naangkon ug ang 3,255 ka mga tinun-an sa Mandaue City nakadawat og P8.2 milyones.

Daghang mga pamilya nga nahupay sa ilang bulsa sa pipila ka mga semana nunot sa ayuda gikan sa gobyerno nga gigahinan og P1.5 bilyones apan milapas sa P1.6 bilyones ang ilang nahatag human niadtong Septiyembre 24. Bisan sa naasoyng pundo nga gigahin sa DSWD, di pa gihapon kini igo sa 2 milyones nga nagparehistro aron makadawat sa ayuda.

Ang gidaghanon di pa gihapon ang tinud-anay nga numero sa nahatagan og ayuda kay kadto lang kini nga may koneksyon sa internet ug aktibo sa social media ilabi na nga ang pagrehistro gipaagi sa online. Kadtong mga nagpuyo sa pwerteng layoa nga kabukiran nga singko sentabos na lang ang plite moabot na sa langit naapil kaha to sila sa nahatagan?

Nalakip ba sad kaha kadtong mga wa gihapoy ikapalit og cell phone ug kon duna man, way load apan naglaum nga unta moabot kanila ang ayuda? Maayo tingali tagaan nato og trabaho ang mga chairman sa committee on education sa matag barangay nga ilang suhiron ning mga purok nga naay mga estudyante nga angay usab nga makadawat ning ayuda sa DSWD.

Nasugdan naman kini nga programa, angay lang gihapon ipadayon sa sunod nga katuigan apan dugangan nila og pundo ug segurohon nga ang tanan nga kwalipikado sa AICS mahatagan silang tanan. (josephelvirtubilan@gmail.com)