Tulo ka mga tawo, nga naglakip sa duha ka menor de edad, nasikop sa mga awtoridad tungod sa giingong pagtulis sa kinitaan sa usa ka buta samtang ang naulahi namaligya og kandila sa Muelle Osmeña o taytayan sa dakbayan sa Lapu-Lapu sulod sa duha ka sunodsunod nga adlaw.
Si Lapu-Lapu City Police Office Public Information Officer Judith Besas nitug-an sa SunStar Cebu nga nilanat og pipila ka oras human nadakpan sa kapolisan ang mga suspek tungod sa giingong pagpanulis sa kuwarta sa usa ka Veronica sa duha ka managlahing mga higayon, usa niini nahitabo niadtong Sabado, Septiyembre 24 samtang ang pinakaulahi niadtong Dominggo.
Matod ni Besas nga ang mga menor de edad nga nangawat sa kinatibuk-ang kantidad nga P630 gikatahong nadakpan mga ala 1:15 sa kaadlawon sa Lunes, Septiyembre 26, samtang si Cleve Villarosa Ardiente, 18, giingong lider, nasikop mga alas 2:15 sa hapon.
Matod niya nga ang duha ka menor de edad gidala sa Home Care Center sa Barangay Poblacion alang sa tukmang interbensyon.
Gibutyag pa ni Besas nga dili lang kini ang mga higayon nga gikatahong nanulis ang mga suspek.
“Naa sad nay pending nga warrants pod ang kanang leader nila, sakto ra jud niabot iyahang age of maturity mao tong pwede na siya kihaan,” matod niya.
Ang suspek kasamtangang gitanggong sa Police Station 3 sa may Hoopsdome Rd. ug gipaabot nga mag-atubang og kasong robbery with force and intimidation.
Si Lapu-Lapu City Mayor Junard “Ahong” Chan niingon nga iyang gipaneguro nga madakpan ug manubag ang mga suspek nga nangawat sa bag ug kuwarta sa usa ka Veronica, giilang person with disability (PWD).
Si Chan niingon nga nasubo siya sa maong hitabo, diin ang mga suspek nga iyang giingon nga walay mga kapansanan ug lig-on og lawas, nipahimulos kang Veronica.
“Wala intawon sila maikog taliwala sa iyang kahimtang nga dili siya makakita, naninguha gihapon si Veronica sa pagtrabaho og tinarong aron aduna siyay mabitbit nga makaon para sa iyang pamilya,” matod ni Chan.
“Apan kining upat nga mga batan-on nga kompleto man unta og lawas ug tibuok pa ang kusog, wa man nuon nagtinarong sa ilang kinabuhi,” dugang pa niya.
Matod ni Besas nga niadtong Lunes gi-report sa kapulisan ang maong mga insidente apan ang biktima unang ni-report niini ngadto kang Chan.