HUMAN madelatar sa target nga petsa alang sa operasyon sa daghang higayon, punting karon sa Davao City Bulk Water Supply Project (DCBWSP) nga magsugod sa ilang operasyon sa una ug ikaduhang kuwarter sa 2023, matud sa project implementer Apo Agua Infrastructura Inc.
Atol sa media forum kagahapon, Lunes, Septyembre 26, gikanayon ni external relations officer May Che Capili nga ang unang optic point sa DCBWSP, nga magsugod sa unang kuwarter, naa sa Tugbok.
Human niini, ang progressive ramp-up sa nahabiling pito ka optic points sa dakbayan mosunod ilabi na sa mga barangay sa Calinan, Talandang, Mandug, Indangan, Cabantian, Panacan, ug Dumoy.
Target nga mosugod ang operasyon sa DCBWSP gitakda unta kini niadtong 2021 una kini nasibog sa 2022 ug mas nadelatar pa gyud ngadto sa 2023 tungod sa mga sirkumstansiya nga dala sa Covid-19 pandemic ug ang transition sa contractors.
Matud ni Capili nga ang J.V. Angeles Construction Corporation di na ang in-charge sa konstruksiyon sa proyekto ug Apo Agua mao nay nanguna uban ang lain pang specialized contractors.
"Sa mga niaging bulan, naninguha gyod ta nga makuha ang mga kritikal na dokumento, materyales, og equipment aron we can sign up the new contractors and ramp up the construction in the coming weeks," matud niya.
Sa samang higayon, ang Apo Agua nagpunting nga molusad og 24/7 nga trabaho sa kritikal nga mga lugar sa sunod nga bulan aron sa pag-maximize sa construction sa proyekto. Ang specialized partner contractors magtutok sab sa water treatment facility ug ang nahabilin nga mechanical, electrical, ug civil nga mga trabaho.
"Next ana is ang testing and commissioning of the critical facilities," batbat ni Capili.
Kung ang bulk water supply magsugod na sa operasyon, makahatud kini og 300 milyon nga litros sa tubig matag adlaw isip dugang ngadto sa 330 milyon nga litros nga mahatud ngadto sa Davao City Water District (DCWD) matag adlaw.
Mosumada nga ang suplay sa tubig sa dakbayan modoble.
"With that quantity, makaya na namo ma-meet ang water demand during peak hours of water usage, in such a way that those areas with low pressure and no water during peak hours, ma-address na nato ilang concern," tug-an ni DCWD spokesperson Jovana Cresta Duhaylungsod.
Hangtud nga wala, ang DCWD magpadayon sa pagpatuman og proyekto aron nga mahulipan ang kahaw-ang sa suplay sa tubig ug ang panawagan, ilabi na sa mga lugar nga nakasinati og balik-balik nga pagkawala sa suplay sa tubig panahon sa peak hours naglakip sa mga porsiyon sa Panacan, Sasa, Lanang, Cabantian, Communal, ug Tugbok.
Dugang sa tigpamaba nga moabot og 29 porsiyento sa konsumante sa DCWD nga nakasinati og suliran sa suplay apan ang uban 24 oras nga water service nga way pawong-pawong.
"Although it’s not widespread, we were able to increase the water supply availability and pressure in several portions of our operations... but it’s not our ideal scenario because these are interim solutions. At the end of the day, we need an additional big amount of water supply," dugang sa Duhaylungsod.