Security guard nga giingong naburyong kay gibiyaan sa iyang uyab nga babayeng minyo, giakusahang nipusil patay niini, lakip sa bana, alas 7:30 sa buntag sa Lunes, Septiyembre 26, sulod sa Cebu International Convention Center (CICC) compound sa Brgy. Guizo, dakbayan sa Mandaue.
Apan dali rang nasikop ang suspek nga si Celso Lauro, 26, ulitawo, security guard, taga Brgy. Maslog, dakbayan sa Danao, kay dunay pulis nga diha duol sa dapit nga nahitaboan.
Duna say naka-report nga mga residente kon diin siya nipaingon human namusil.
Ang mga biktima giilang sila si Romeo Oro, Jr. , 38, security guard ug asawa nga si Maria Chona, 39, kinsa pulos nangamatay diha-diha sa mga samad pinusilan sa nagkadaiyang bahin sa kalawasan.
Si Police Major Lea Rey Endozo, hepe sa Centro Police Station 1 sa Mandaue City Police Office (MCPO), nihulagway nga sa ilang pasiunang imbestigasyon sa motibo, kini “crime of passion.”
Matod ni Endozo nga si Lauro, kinsa niangkon sa kremin, giingong nikompirmar nga duna silay relasyon ni Maria Chona ug nagpuyo na silang duha.
Giingong sayo nga niabot ang suspek sa lugar ug nangita kon asa nagpuyo ang magtiayong Oro.
Dihang iyang natultulan ang pinuy-anan sud sa compound sa CICC pinaagi sa pagtudlo sa silingan, niadto kini sa balay sa mga Oro ug diretsong namusil sa magtiayon.
Sa pagsibat ni Lauro ug nakagawas sa gate, nakasakay siya sa niagi nga bus, apan usa ka pulis nga diha sa duol dali nga niresponde.
Ningsulti ang mga lumolupyo ug nihulagway sa bayhon og biste nga gisul-ob sa suspek dayon gibabagan sa pulis ang bus.
Wa nisukol ang suspek dihang gidakop sa pulis nga wa pa nganli sa pagsuwat ning taho.
Matod ni Endozo nga ilang susihon ang background ni Lauro kon wa ba kini nalambigit sa ubang mga krimen.
NANGUTANA
Si Abigail, silingan sa mga Oro, niasoy sa Superbalita Cebu nga ang suspek naglakaw nga naabot sa ilang lugar.
Nangutana kaniya si Lauro kon asa ang panimalay sa magtiayong “Meo ug Chona” ug ilang gitudloan kay wa sila nasayod sa motibo niini.
Ang suspek nag-facemask niadtong higayuna ug kalma kaayo nga niadto sa balay sa mga Oro.
“Ako gitudloan na mao na ilang balay. Unya giingnan nako nga tudloi, Nak. Nidiretso man siya ingon nga ‘ayaw na’ dayon nibunot sa armas, gipamusil ang mga biktima,” dugang ni Abigail.
Nidagan ang suspek human namusil apan nibalik sa iyang giagian kay gitan-aw kon buhi pa ang mga biktima, dayon nigawas sa pikas gate.
Gibutyag ni Abigail nga dugay na nga isyu sa ilang lugar nga giingong si Maria Chona nangabit.
Wala sila nagdahom nga ang lalaki nga ilang gikaestorya kagahapon sa buntag mao diay si Lauro.
Si Junrey Otero, kabanay sa usa sa mga biktima nga nahinabi sa Superbalita Cebu, nagkanayon nga dugay na nasakpan ni Romeo si Maria Chona nga dunay giingong kabit.
Tungod sa giingong gibuhat sa asawa, nagkaproblema ang pamilya sa mga biktima.
Ang magtiayon dunay tulo ka mga anak, ang kamaguwangan 12 anyos nga babaye samtang ang mga manghod 4 ug 3 anyos.
Ang kinamaguwangan nga anak niasoy ning mantalaan nga ang iyang amahan niingon kaniya nga, ‘Bye, Nak,’ dihang padung na siya moeskwela kagahapon sa buntag.
Atol sa hitabo, diha ang iyang mga manghod, dugang asoy sa bata.
“Ana siya nako na, ‘goodbye, Nak. School na. Inig abot nimo unya, manglarga ta tibuok pamilya,” dugang sa bata.
LIVE-IN NA
Si Lauro nga nahinabi sa mga tigbalita nibutyag nga nagkauyab sila ni Maria Chona niadtong Pebrero 2022.
Si Maria Chona nagtrabaho isip ahente sa usa ka kompaniya sa Mandaue City.
Di lang kay sila nagkauyab, nagtipon silang duha sa pagpuyo sa Brgy. Casuntingan ug giingon niya nga mismo si Maria Chona ang nangita og balay nga ilang kapuy-an.
Giingong iya kining gipautang og P50,000 nga giingong gipautang usab ngadto sa mga kauban niini sa trabaho.
Wa siya bayri ni Maria Chona.
“Napungot ko ba kay molakaw dili mananghid. Ako na man siyang giingnan nga nisulod naman ka ani, padayon na kay lahi baya ko. Unya kon mag-away sila sa iyang bana, apilon ko. Naa sa video, bahad man ako giunhan,” dugang ni Lauro.
Gusto unta sa suspek nga si Maria Chona dili na molakaw sa ilang gipuy-an ug manglangyaw sila sa laing dapit layo sa pamilya niini.
Tungod sa iyang kalagot nga nipauli sa iyang pamilya si Maria Chona, giplano niya nga patyon na lang ang magtiayon.