GIPAHIBAWO sa Land Transportation Franchising and Regulatory Board (LTFRB) sa Davao Region Martes, Septyembre 27, 2022, nga ang bag-ong usbaw sa singil sa plite epektibo Oktubre 3, 2022.

Alang sa traditional public utility jeepneys (TPUJ), ang bag-ong pagtaas sa pasahe moabot na og P12 gikan sa P11, uban ang dugang P1.80 alang sa mosunod nga kilometros.

Ang pasahe alang sa modern public utility jeepneys (MPUJ) mitaas sab og P1 nga moabot na og P13 gikan sa P12. Samtang P2.20 sab ang dugang matag kilometro.

Matud sa LTFRB, moabot og 9 porsiyento ang pagtaas sa base fare ug 20 porsiyento matag kilometro alang sa TPUJ, samtang 8 porsiyento ang pagtaas alang sa base fare ug 22 porsiyento nga pagtaas sa matag kilometro alang sa MPUJ.

Nalakip sa fare hike mao ang public utility buses (PUB) nga nagbiyahian sa rehiyon. Alang sa regular City PUB, ang bag-ong base fare naa sa P13 uban sa dugang P2.25 matag kilometro. Moabot kini sa 18 porsiyento nga pagtaas gikan sa kanhi nga base fare nga P11.

Alang sa air-conditioned City PUB, ang bag-ong base fare naa sa P15 gikan sa kanhi P13 - dunay pagtaas nga 15 porsiyento. P2.65 sab ang dugang sa mosunod nga kilometro. Regular Provincial PUB nagtaas sab sa ilang pasahe ngadto sa P11 gikan sa P9, uban ang dugang P1.9 matag kilometro.

Lakip ang serbisyo sa taksi, gihatagan sab og gahum nga pagtaas og P5 sa ilang flag down rate ug i-adjust ang base fare gikan sa P40 ngadto sa P45.

Tungod niini, mga dunay prangkisa nga transportasyon, operators, ug mga drayber gitambagan nga mangayo og pinakabag-ong fare matrix gikan sa buhatan sa LTFRB aron nga makasugod na sila og kolekta og taas nga pasahe.

Mga dokumento nga gikinahanglan sa fare matrix naglakip sa bag-ong OR/CR, franchise verification, kopya sa provisional authority, ug official receipt sa bayad.

Ang bayad naglakip sa P510 alang sa pagtaas sa pasahe, P10 alang sa legal research fee matag case number, ug P50 matag yunit alang sa fare matrix.

Ang eskedyul sa pagbayad ug pagpagawas sa fare matrices magsugod ugmang adlawa, Septyembre 29 alang sa PUBs, Septyembre 30 alang sa taxi units, Oktubre 3 alang sa PUJ routes sa A-C, Oktubre 4 alang sa PUJ routes sa D-M, ug Oktubre 5 alang sa PUJ routes sa P-W.

Sa Oktubre 6 ug 7, tanang rota ug denominasyon puwede na nga makaakomodar, naglakip sa Davao del Sur PUJ sa Oktubre 6 ug sa Davao del Norte PUJ sa sunod nga adlaw.

Gipahimangnoan sa LTFRB-Davao nga tanang public transport vehicles kinahanglan nga magpakita sa ilang fare matrix nga ibutang sa ilang yunit aron nga di masilotan.