AGI'G pagpatuman sa programa sa komunidad alang sa pakig-uli sa mga rebelde ngadto sa sabakan sa gobyerno, ang kagamhanang lokal sa Davao City mihatag og 15 ka mga motorsiklo ngadto sa mga kanhi rebelde.
Gitawag sab sila nga mga "friends rescued" kinsa nahimong mga peace-builders sa Paquibato District, Davao City ubos sa Peace 911 nga programa sa lokal nga kagamhanan.
Nasayran nga sila kadtong mga mitabang sa gobyerno sa peace-building activities aron nga mamahimong hapsay ug malinawon ang Paquibato District.
Ang turnover ceremony gipangunahan ni City Mayor’s Office Assistant Chief-of-Staff ug Peace 911 Focal Person Atty. Jonah Margarette Presto niadtong Septyembre 16, 2022.
Kabahin sab ang programa sa Enhanced Comprehensive Local Integration Program (E-clip) nga nagtumong sa pagtabang sa mga kanhi rebelde nga manginabuhing malinawon sa patag.