Usa ang patay ug usa ang angol sa pagpamusil sa isla sa Olango, Dakbayan sa Lapu-Lapu.

Atol niining pagsuwat nagpadayon pa ang Police Station 1 sa Lapu-Lapu City Police Office sa imbestigayon sa pagpamusil sa Barangay Talima, isla sa Olango.

Matod pa ni Police Major Felix Cleopas III, hepe sa Police Station 1, nga nahitabo ang pagpamusil niadtong Lunes, Septiyembre 26 sa gabii, sa Sityo Crossing, Barangay Talima.

Base sa mga saksi nga tulo ka wa pa mailhing mga lalaki ningsulong sa balay sa mga biktima nga nag-andam unta sa panihapon niadtong higayona.

Kalit nga gipamusil ang mga biktima nga nailhan nga sila si Leoncio Tongco, 48, taga-Barangay Tingo ug Bianca Deborah Zurfluh, 25, dalaga, Swiss national.

Sumala pa ni Cleopas sa dihang nahinabi sa Superbalita Cebu nga si Tongco ray tuyo sa mga mamumuno samtang napagan lang ang langyaw nga suway nga nanalipod ni Tongco sa dihang nakakita nga gibirahan.

Sa inisyal nga kasayuran nga naabot ni Cleopas, nakabsan sa iyang kinabuhi si Tongco nga gidala sa Vicente Sotto Memorial Medical Center, samtang luwas ra ang Swiss national.

Dumot ang usa sa gitan-aw nga anggulo.

“Ang usa aning suspek nagkurog pa kuno nga nagpusil morag dili anad,” asoy ni Cleopas sigun sa saysay sa saksi.

Kapulisan padayong nangita sa tulo ka mga mamumuno.