Dul-an sa usa ka kilong marijuana ang nasakmit sa mga sakop sa Carbon Police Station sa Cebu City Police Office gikan sa usa ka lalaki atol sa buy-bust nga gilusad sa Lunes, alas 6:30 sa gabii, Septiyembre 26, 2022 sa Barangay Ermita, dakbayan sa Sugbo.
Ang suspek giila nga si Renzo Medalle Alferez, alyas Renz, 23, graduwado sa alternative learning system (ALS), taga sitio Little Baguio, Barangay Mambaling, dakbayan sa Sugbo. Nakuha gikan kaniya ang 805 gramos sa pinaugang dahon sa marijuana nga mobalor og P96,600.
Matod ni Police Major Kenneth Albotra, hepe sa Carbon Police Station 5, nga namonitor nila ang illegal nga negusyo sa suspek nga maoy hinungdan nga ilang gilusad ang anti-illegal drug operation.
Giingong gikan sa dakbayan sa Toledo ang supply sa marijuana ni Alferez ug nailhan na usab nila ang amo niini nga maoy target sa follow-up operation.
“Naa siyay amo nga naa sa Cebu City. In fact mao sad ang atong gi monitor nya ang ilahang source didto sa Toledo City,” matod ni Albotra.
Ang iyang mga kustomer iya ra usab nga mga kaila nga kusog mogamit og marijuana apan nabantayan siya sa mga asset sa kapulisan nga namaligyag illegal nga drugas.
Giingong giangkon sa suspek nga siya napugos sa pagpamaligya og marijuana tungod kay wala siyay trabaho. Giingong mabaligya ni Alferez ang maong gidaghanon sa marijuana sulod sa duha ka mga semana.
Gitakdang pasakaan og kaso karong adlawa, Septiyembre 28, si Alferez sa kalapasan sa Sec. 5 & Sec. 11 Article II sa RA 9165 kun Comprehensive Dangerous Drugs Act of 2002.
Gipangsubay pa karon kon kinsa ang mga kauban ni Alferez nga mamaligya usab og marijuana sa Carbon sanglit ang kapulisan nagtuo nga aduna kini grupo.
Human gihugtan ang kampanya sa shabu, nabantayan sa kapulisan nga nisiaw na usab ang marijuana sa pagkatap sa dakbayan sa Sugbo.