Si Monsignor Frederick Kriekenbeek, kinsa naila nga usa sa mga pioneering exorcist sa Archdiocese of Cebu, namatay sa edad nga 90. Malinawon siyang namatay niadtong Lunes, Sept. 26, 2022.
Gi-report sa Archdiocese ang pagkamatay ni Kriekenbeek sa ilang opisyal nga panid sa Facebook (FB) sa Martes, Septiyembre 27. Ang mga detalye sa paghaya ug lubong ni Kriekenbeek ipahibalo sa ulahi nga petsa.
Sa panahon ni anhing Arsobispo Ricardo Cardinal Vidal, gihatagan og awtoridad si Kriekenbeek sa pagpahigayon og exorcism. Apan samtang si Kriekenbeek nagsilbi nga exorcist sa Archdiocese, ang iyang posisyon dili gyud pormal.
Niadtong 2019 lang nga si Kriekenbeek, uban sa unom ka mga pari ug usa ka layko, gitudlo sa mipuli ni Vidal, Cebu Archbishop Jose Palma, isip founding members sa Archdiocese of Cebu Office of Deliverance and Exorcism, kansang tahas mao ang pagsulbad sa gikataho nga mga possession sa mga demonyo dinhi sa Cebu.
Gawas sa iyang trabaho isip exorcist ug pari, si Kriekenbeek mao usab ang founder sa pipila ka relihiyosong mga komunidad sa Sugbo sama sa Living the Gospel Community (LGC) ug Mary’s Little Children Community.
Sumala sa profile nga gihatag sa Conference of Major Superiors sa Pilipinas, si Kriekenbeek natawo niadtong Abril 12, 1932 sa Cabanatuan City, Nueva Ecija.
Si Kriekenbeek gipa-abroad ug sa ngadto-ngadto siya nagtuon sa Harvard University sa Estados Unidos niadtong 1950. Siya unta mopadayon sa usa ka karera sa International Law human sa pagsulod sa Harvard Law School apan nadani sa kinabuhi sa pagkapari.
Niadtong 1954, nakahukom si Kriekenbeek nga mosulod sa eskwelahan sa St. Philip Neri alang sa Delayed Vocations para sa Latin ug Greek sa Boston bisan pa sa pagsupak sa iyang pamilya ug mga higala. Paglabay sa usa ka tuig, nisulod siya sa St. John Seminary sa Massachusetts ug naordinahan didto niadtong Pebrero 2, 1961.
Sa katapusan nibalik siya sa Pilipinas aron ipadayon ang iyang bokasyon.