Nag-atubang og makapakugang nga akusasyon si American boxing legend Floyd Mayweather nga scripted ang iyang exhibition bout sa RIZEN 38 niadtong Dominggo, Septiyembre 25, 2022 sa Saitama, Japan.

Gawas niini, giakusahan sab ang gitawag og “Money” nga nibutyag og mas dakong kantidad kabahin sa iyang premyo ning maong away.

Sa promosyon, yanong gi-knockout ni Mayweather sa 2nd round si Japanese mixed martial artist Mikuru Asakura pinaagi sa iyang tuo nga kumo.

Hinuon, sa videos nga ningkatap sa social media, nabantayan nga wala ra naantimano pagkaigo si Asakura sa kumo ni Mayweather.

Gituohan nga niarte lang si Asakura nga daw naigo og solidong kumo nga maoy hinungdan sa iyang pagkatumba.

Si retired UFC star Chael Sonnen nipadayag sa World Boxing News kabahin sa iyang pagtuo nga adunay surambaw ang away.

Nidugang si Sonnen nga mas dako ang gibutyag ni Mayweather kabahin sa nabulsa niyang premyo kumpara sa tinuod nga kantidad.

Pipila ka mga adlaw sa wala pa ang away, nagkanayon si Mayweaher sa interbyu sa The Daily Mail nga naa sa $15 million ngadto sa $20 million ang iyang premyo sa away.

“From this exhibition alone, I will make somewhere upwards of $15-20million. That’s just from this exhibition,” batbat pa ni Mayweather.

Sa laing bahin, niabot si Mayweather niadtong Martes sa gabii, Septiyembre 27, 2022, sa Manila alang sa usa ka business trip.

Kini maoy ikaduhang higayon nga nibisita si Mayweather sa Pilipinas.

“I love it. Great place, great people, I love the weather. Glad to be back,” asoy ni Mayweather nga napatik sa www.abs-cbnnews.com.