MOABOT sa 5,500 ka mga manggugubat sa Moro Islamic Liberation Front (MILF) ang gipailawom sa proseso sa "decommissioning" karong bulana lang sa Septyembre nga nisugod niadtong adlaw nga Martes, September 27, 2022.
Kini kabahin sa kinatibuk-ang ihap nga 12,000 sa ikatulong hugna.
Ang 200 ka miyembro sa MILF nga nakakompleto sa proseso sa "decommissioning" nakadawat usab og P100,000 nga transitional cash assistance.
Mga kanhi kaaway sa gobyerno tagsa-tagsa og bitbit sa mga tag-as nga matang sa armas.
Bag-ohay lang, gilusad sa Independent Decommissioning Body (IDB) ug mga miyembro sa Normalization Mechanisms sa GPH-MILF Implementing Peace Panel ang ikatulong hugna sa proseso sa "decommissioning" sa Old Provincial Capitol sa Barangay Simuay, Sultan Kudarat, Maguindanao del Norte.
Ang aktibidad gipangunahan ni Bangsamoro Autonomous Region in Muslim Mindanao (Barmm) Interim Chief Minister Ahod Balawag Ebrahim, Office of the Presidential Adviser on Peace, Reconciliation and Unity (Opapru) Secretary Carlito Galvez Jr., IDB Chair Ambassador Ahmet Idem Akay, MILF Implementing Peace Panel Minister Mohagher Iqbal ug Atty. Joana Paula Domingo nga OSAP Undersecretary isip representante ni Special Assistant to the President Secretary Ernesto Antonio Lagdameo Jr.
Sa pagkakaron, niabot na sa 19,345 ka MILF fighters ang malampusong nakaagi sa maong proseso.
Ang Phase 1 gihimo kaniadtong 2015 samtang ang Phase 2 gihimo gikan sa 2019 hangtud 2020, ug ang una nga batch alang sa Phase 3 gikan sa 2021 hangtud karong tuiga.
Gipasalamatan sa Barmm chief minister si Presidente Ferdinand "Bongbong" Marcos Jr. sa paghatag og bili ug pagsuporta sa proseso sa kalinaw sa Bangsamoro.
Naghiusa usab ang mga lider sa MILF ug Moro National Liberation Front (MNLF) alang sa kalamboan ug kalinaw sa Mindanao.
Ang proseso sa "decommissioning" kabahin sa security component sa Normalization Program sa nagtinguha nga mahimong magmalinawon ug produktibo isip lungsuranon ang kanhi mga manggugubat sa MILF.