NIGRADO ang Public Safety and Security Command Center (PSSCC) sa security and cluster simulation exercise (simex) sa Davao City og 7.5 kon diin ang pinakataas naa sa 10, tungod sa matud pa duna pay lugar alang sa pagpalambo.

"Nasa sa 7.5 to 8 [out of 10] ang pag-execute, kung i-perfect man gud nato lisod, and I think there is no such thing nga pag-abot sa execution ng mga security and safety plan na 100 percent kahit papaano naay mga glitches gyud na siya, diha pud nato i-focus kung unsa na siya [setbacks]," matud ni Col. Angel Sumagaysay sa paghinabi kaniya uban ang Davao City Disaster Radio Miyerkules, Septyembre 28, 2022.

Gisulti ni Sumagaysay nga dunay nasinating kapakyasan sa hisgutanang komunikasyon sa nagkadaiyang security units atol sa "inter-operational response".

Apan gitin-aw ni Sumagaysay nga ang simex malampuson.

"Considering ang mga scenarios (the scenarios) are very complicated. At least na-perform ng atoang mga responders, security, and safety.

Nagpasalamat pud mi sa participation ng community, Department of Education Region 11 and Davao City National High School (DCNHS)," padayag ni Sumagaysay.

Niadtong Septyembre 27, 2022, milusad ang PSSC og simex sa pagpalabay og bomba, pagpamusil, ug hostage-taking nga milungtad og kapin duha ka oras nga giingong maoy pinakataas nga simex nga nahitabo sa siyudad ilabi na sa DCNHS gikan alas 3:00 - 5:00 sa hapon.

Subay sa taho sa City Information Office (CIO), 222 ka personahe nga gipakatag gikan sa Task Force Davao, Davao City Police Office, Tactical Operations Wing Eastern Mindanao, Naval Forces Eastern Mindanao, Joint Special Operations Group, Davao City Police Office SWAT, Special Action Force, Bureau of Fire Protection 11, Davao 911, Davao City Public Safety and Security Command Center, City Social Welfare and Development Office, Davao City National High School, ug Department of Education 11.

Tug-an sa PSSCC nga si Davao City Mayor Sebastian Z. Duterte maoy tsirman sa Incident Command Post uban sa team leaders ug commanders gikan sa nagkadaiyang misalmot nga yunit.

Samtang gisulti sa CIO nga kapin sa 20 ka yunit sa mobility assets sa dakbayan sama sa fire trucks, ambulances, rescue trucks, ug uban pa gipakatag sa lugar atol sa simex.