NAHIMONG bugno sa magkumare dihang nasayran sa usa kanila nga gikabit niini ang mister alas 10 sa buntag niadtong Lunes, Septyembre 26 didto sa Barangay Matina Aplaya, Davao City.
Midangop sa Talomo Police Station ang usa ka Imelda, 38-anyos, dihang giayo siya'g dumog sa iyang kumare nga si Jocelyn, 34-anyos.
Sa impormasyon gikan sa Talomo Police Station, nasayran nga nanabi ang silingan ni Jocelyn nga ang bana niini nagkuyog sila ni Imelda sa Bonguyan Beach niadtong Dominggo.
Dihang nasayod si Jocelyn, dali niining gikompronta si Imelda, labi pa nga nakuhaan kini og piktyur apan hanap.
Gilimod sab ni Roger, 38-anyos, ang hitabo, ug suma niini, dili sila ang nakuhaan og litrato.
Bisan pa man niini, gidumog ni Jocelyn si Imelda nga miresulta sa pagkasamad sa bukton ug nawong niini.
Sa laing impormasyon, nasayran sa Superbalita Davao nga dunay mga ebidensiya nga dalhon si Jocelyn sa ilang pag-abot sa barangay atol sa ilang husay.