Ang Cebu City Police Office (CCPO) hugot sa ilang pagbantay nga dili malutsan sa mga notadong kawatan ning nagkaduol na ang kapaskohan, lakip sa budol-budol ug uban pa.
Tungod niini, mga establisemento giawhag nga magbutang og mga CCTV camera aron dali masulbad ang mga krimen.
Matod ni Police Lieutenant Conel Wilbert Parilla, deputy city director for administration sa CCPO, human madakpi kadtong mga organisadong mangingilad gikan sa kaulohan, mga lokal nga grupo ang ilang gibantayan.
Bisan pa niini, ilang gipahugtan ang ilang pagbantay nga dili sila malutsan sa maong mga kriminal sanglit ang mouso ining panahon sa Pasko mao ang pagpangilad sa ATM, budolbudol ug kawat sa mga dagkong tindahan.
“Wala pa tong mga organized group gyud nga mga kawatan nga mga salisi. Lahi man to sila kay dinagko man to ang ilang igo, moapil pud to sila sa budol-budol, ilad sa ATM naa na sila ma December. Daghan na sad mabiktima ani nila. Mao na sad ni ang part sa atoang campaign sa information dissemination sa atong katawhan nga magbantay,” matod ni Parilla.
Subling niawhag ang kapulisan sa Konseho sa Dakbayan nga i-mandatory ang pagpataod sa CCTV camera sa sulod ug gawas sa mga establisemento.
Lakip sa ilang gi-monitor ang pagkatap sa mga peke nga kwarta diin ang kasagaran nga mabiktima niini mao kadtong gagmay nga mga tindahan ug mga vendors nga walay makina sa pag-ila sa tinuod ug dili tinuod nga kwarta.