Gisugdan na og tangtang sa Cebu City Government pinaagi sa Technical Infrastructure Committee (TIC) ang mga poste sa utilities nga nagharag ug delikado nga makadisgrasya.

Si Konsehal Jerry Guardo, chairman sa committee on infrastructure sa City Council ug chairman sa TIC ilawom sa Office of the Mayor, nagkanayon nga nakuha na nila ang poste nga nagbahirig gikan sa Barangay Buhisan, Sambag 2, Cogon Ramos, Lorega-San Miguel, Sambag 1, Basak Pardo, Ermita ug Bacayan.

Matod ni Guardo nga ang maong programa apil sa Oplan Ratsada ni Mayor Michael Rama alang sa paglimpyo sa karsada aron luwas gikan sa nagbitay nga wire ug mga katumbahon nga poste.

Apan gipadayag ni Guardo nga wala pa sila nahuman ug aduna pay daghang poste sa utilities nga angay nilang tangtangon sa nagkalainlaing barangay sa dakbayan.

Gihulagway sa konsehal nga kon dili maatiman ang maong matang sa problema, makamugna pa kini og dako nga suliran sanglit dilikado kini sa mga tawo nga naglakaw ug kadtong nagmaneho sa ilang mga sakyanan.

“Our team from Spaghetti Wire Erradication Program - will also elevate those sagged wires to a maximum height requirement and removed those unsightly and dead wires,” padayag ni Guardo.

Ang konsehal nagkanayon nga ang nahisgutang mga poste naapektohan sa bagyong Odette niadto pang Disyembre ug ang ilang gitutokan karon mao ang anaa sa mga interior portion sa mga barangay.

Ang chairman sa TIC niawhag sa barangay officials sa pag-report sa mga poste nga nagbahirig aron mailisan dayon sa utilities.