Nimando si Lapu-Lapu City Mayor Junard “Ahong” Chan ngadto sa kapulisan sa estrikto nga pagpatuman sa curfew hour alang sa mga menor de edad human sa ulahing kaso sa kawat ug pagpangulata nga naglambigit sa mga menor.

Si Chan niluwat sa iyang hugot nga mando human sa pagkasikop niadtong Lunes, Septiyembre 26, 2022, sa tulo ka mga indibiduwal, duha niini menor, tungod sa giingong pagkawat sa limos sa usa ka buta sa duha ka managlahing mga hitabo.

Matod sa mayor, nakadawat siya og taho sa pagpangulata nga naglambigit og mga menor sa Barangay Babag.

Tungod niini, si Chan nimando sa kapulisan sa pagpatrolya ug pagluwas sa mga latagaw nga menor sa dakbayan sa lawom nang gabii.

Ang curfew sa mga menor magsugod sa alas 10: 00 sa gabii hangtod sa alas 5:00 sa buntag sa sunod adlaw.

“Ato na pod nga gimanduan ang mga barangay nga i-mobilize ang mga barangay tanod nga mag-roving matag gabii. Basta seguridad na ang topic, zero tolerance gyud ta ana,” matod ni Chan.

“Kon adunay makit-an nga mga minors nga naglibod suroy lagpas sa alas 10 sa gabii hangtod sa alas 5 sa buntag, ato silang sikopon ug i-rescue kay una, gipalayo nato sila gikan sa mga dautan nga posibleng mahitabo kanila ug ikaduha, tungod sa kamingaw na nianang orasa, prone pod sila nga makamugna og plano nga dautan sama sa mga mitulis ni Veronica,” dugang niya.

Base sa kasamtangang ordinansa, si Chan nagkanayon nga walay labot kadtong mga menor nga kuyog sa ilang mga ginikanan o dunay mahitabong emerhensiya.

Gipasabot sa mayor nga kinahanglan nga dunay police visibility sa mga publikong dapit sa dakbayan, labina sa gabii aron dili na mausab ang mga panghitabo.

Gitumbok sa mayor nga matutokan ang mga plaza, park nga nahimotang sa tiilan sa Marcelo Fernan Bridge, Muelle Osmeña, Mactan Export Processing Zone (MEPZ), Tamiya ug uban pa.