Ang Cebu City Police Office (CCPO) magsugod sa mas estrikto nga pagpanakop sa kalapasan sa mga ordinansa sa dakbayan sama sa pagdili sa pagpanigarilyo ug pagpangluwa sa publikong dapit, lakip sa pagpataka og labay sa basura ug uban pa, sugod sa Sabado, Oktubre 1, 2022.
Kini human sa pagtapos sa tulo ka adlaw nga dry run sa Oplan Disiplina unya sa Biyernes, Septiyembre 30.
Ang Oplan Disiplina mopatuman sa estrikto nga disiplina sa mga residente ug mga bisita sa dakbayan.
Si Police Lieutenant Colonel Wilbert Parilla sa CCPO nagkanayon nga ang programa gitambayayungan sa kapulisan ug Kagamhanan sa Dakbayan.
Ang programa ipatuman bisan sa mga suok nga barangay uban sa pag-abag sa mga opisyal sa dapit.
Ubos sa City Ordinance 1361,”.. spitting, urinating or defecating in public; failing to clean one’s surroundings; failing to provide proper waste receptacles; and posting graffiti, posters and handbills, among others, are prohibited.”
Ang first-time violators hatagan og pito ka adlaw aron makabayad sa multa nga P500 o mohimo og community service.
Samtang ang habitual offenders o kanunay nga molapas sa balaod, dunay multa gikan sa P1,000 ngadto sa P5,000 o pagkabilanggo sulod sa usa ngadto sa unom ka buwan, o ang duha ka silot gipahamtang kon momando ang korte.
Ang Ordinance 1895 usab nagkanayon “ prohibits smoking tobacco in non-smoking or smoke-free establishments such as entertainment centers, educational and learning centers, places of worship, government offices, health and medical centers, and other zones whether publicly or privately owned.”
Ang madakpan sa pagpanigarilyo multahan og P100 sa unang kalapasan ug P200 sa ikaduha. Kon kanunay na, P500 ang multa ug makasuhan. (AYB / TPT / SunStar Cebu)