Usa ka amahan nangayo og tabang sa Police Station 3 sa Mandaue City Police Office (MCPO) aron madala ang iyang kaanakon na nga asawa ngadto sa ospital, alas 2:30 sa kaadlawon kagahapon, Septiyembre 28, 2022.
Si Patrolman Semon Villapaña daling niadto sa nahimutangan sa babaye nga duol sa police station. Iyang gidala sa sulod ug gipahigda una sa lamisa sa police station samtang nagpaabot og kasakyan padulong sa ospital.
Apan nagping-it na sa kasakit ang inahan nga si Mariel Botron, 21, residente sa Barangay Basak, hinungdan nga giabagan sa mga personnel sa Basak PNP ug pipila ka gutlo, nahimugso ang usa ka himsog nga batang babaye.
Ang inahan ug anak daling gidala ni Villapaña sa Eversly Childs Sanitarium and General Hospital sa Jagobiao nga silingang Barangay sa Basak.
Samtang, ang hepe sa Basak Police Station nga si Police Captain Emmanuel Rabaya nidayeg sa iyang personnel nga wala nagpanuko sa pagtabang sa babaye nga manganakay.
Matod niya, bisan walay background sa pagka nurse si Villapaña, apan wala kini nagduha-duha sa pagtabang nga manganak si Botron.
Human nahimugso ang bata, gidali nila sa pagputos sa habol ang puya nga wala pa gani maputol ang pusod ug wala pa usab mogawas ang inunlan, ilang gidala sa tambalanan sakay sa patrol car alang sa hingpit nga pag-atiman.
“Ingun niya nga dili na gyud kuno matabang ang kasakit sa tiyan, manganak na gyud kuno siya. Mao to gibutang nila sa table diri sa police station, gitabangan nila og ano paanak ba bisan wala silay experience,” matod ni Rabaya.
Si Villapaña nasulod sa PNP niadtong 2017 ug dili pa lang dugay nadestino sa Basak Police Station. Nakita na ni Rabaya nga kugihan nga pagka pulis si Villapaña.
Tungod sa gihimo niini, hatagan og pasidungog ni Rabaya ang iyang sakop ug ila usab irekomendar sa MCPO nga hatagan og commendation.
Wala pa masayri kon unsay ngalan sa masuso.
Atol ning pagsuwat, si Rabaya moadto pa sa tambalanan aron hatagan og hinabang ang batan-ong magtiayon lakip na sa mga sapot sa bata nga bag-ong natawo.