GISUSI na sa kapulisan ang kamatayon sa priso human giingong gi-torture alas 3:00 sa kaadlawon, Miyerkules, Septyembre 28, 2022, sa Barira, Maguindanao Province.
Giila ang biktima nga si Johairie Dagalangit, 23, ulitawo ug nagpuyo sa nahisgutang lungsod.
Matud ni Maguindanao Provincial Police Office (PPO) Director Colonel Roel Sermese, chief of police sa Barira Municipal Police Station (MPS), nga si Major Radzak Musa Shariff, gipalagpot na sa puwesto alang sa patas nga imbestigasyon.
Samtang laing 12 ka mga pulis nga "on-duty" atol sa hitabo gibalhin sab ngadto sa Provincial Personnel Holding and Accounting Unit (PPHAU) sa Maguindanao PPO.
Nagmando na sab ang Regional Investigation and Detective Management sa Police Regional Office sa Bangsamoro Region og mas lawom nga imbestigasyon aron masubay kon duna ba'y angay manubag sa kamatayon ni Dagalangit.
Una nang gitawgan sa mga sakop sa Barira MPS ang pamilya ni Dagalangit ug gipahibawo nga patay na ang biktima tungod sa giingon nga "bangungot".
Apan nadiskobre sa pamilya nga daghan og mga bun-og ug dunay hiwa sa lawas ang biktima human giingong gitortyur sulod sa selda sa Barira MPS.
Gibutyag sa pamilya nga dili priso si Dagalangit ug igo lang siya nga gipakustodiya sa mga pulis human nakabangga og bata sa pagmaneho niini og motorsiklo.
Samtang gihangyo sa pamilya ang National Bureau of Investigation ug Commission on Human Rights nga imbestigahan ang kamatayon sa biktima.