Mga kawani sa lungsod sa Consolacion bantayan na sa ilang trabaho.
Si Mayor Theresa “Neneng” Alegado niluwat niini human siya nakadawat og daghang mga reklamo batok sa mga kawani sa nagkalainlaing departamento sa munisipyo nga dili maayong moatiman sa publiko.
“So you have a big problem and you seek assistance but no one will entertain you because it’s not office hours. Will that make you happy? Let’s go back to the golden rule that ‘whatever you sow, you reap’,” matod ni Alegado.
Atol sa iyang pamahayag human sa flag-raising ceremony niadtong Lunes, Septiyembre 26, 2022, ang mayor niawhag sa mga kawani sa pagpataas sa ilang productivity o resulta sa trabaho ug dili magtanga sa oras nga tingtrabaho.
“Productivity ang akong gusto. Ang akong gusto nga ipaabot nga mensahe ninyo, unsa man nang productivity? Daghan tang na-deliver sa adlaw nga kita gisuholan, dili kay daghan tang gipahuway sa mga adlaw nga kita anaa sa atong pwesto,” matod sa mayor.
Matod ni Alegado nga daghang mga tawo ang ningduol kaniya aron moreklamo sa pagtratar kanila sa mga kawani mao nga nimando siya og imbestigasyon aron masuta kon kini tinuod ba.
“Dili na kinahanglan i-text kay mangadto gyud sa office kay manumbong gyud, and only then, dili ko ka confront ninyo immediately kay daghan man mo. But this time, sugdan na nato. Let us be sensitive to the complains kay kada adlaw naay mo-complain sa about sa market, naay mag-complain sa atong traffic ug uban pang mga opisina kay naa daw garbuso,” dugang sa mayor.
Si Alegado nitambag sa mga kawani nga magmahigalaon sa pagserbisyo sa publiko.