Nangaangol ang upat ka mga bata nga nagduwa ubos sa kahoy nga Magtalisay dihang naigo sa kilat sa Sitio Cagang, Brgy. Dumlog, dakbayan sa Talisay, alas 12:18 sa udto kagahapon, Septiyembre 29, 2022.
Gikompirmar kini nga taho sa City of Talisay Disaster Risk Reduction and Management Office (CT-DRRMO).
Asoy ni Gerard Canencia, usa sa mga responder sa CT-DRRMO, ang kahoy nga Magtalisay maoy nasentro sa pagkaigo sa kilat hinungdan nga naapektohan ang upat ka mga bata nga nagduwa sa ubos niini.
“Nagduwa to sila, mao to nikilat, naigo ang kahoy mao to nga napiksan sila sa mga sanga,” matod ni Canencia sa Septiyembre 29, 2022.
Ang mga biktima nag-edad og tres, siyete ug otso anyos, usa ka babaye ug tulo ka mga lalaki, nakaangkon og multiple abrasions o samad sa ulo, bukton ug buko-buko.
Ang CT-DRRMO daling niresponde sa hitabo ug gihatagan og first aid ang mga bata. Ang tulo kanila gidala sa ospital alang sa dugang medikal nga pag-atiman.
Subay niini, giawhag sa responders ang mga ginikanan nga susihon ang mga bata kon luwas ba ang giduwaan nga lugar.
Gipahimangnoan usab ang mga bata nga dili magsige og gawas ilabi ning kalitkalit nga pag-usab sa kahimtang sa panahon, naglagiting ang kainit apan mokalit pagpanag-om ang langit ug mouwan.
Ang Philippine Atmospheric Geophysical Astronomical Services Administration (Pagasa) Mactan, unang niluwat og mga pahinumdom sa publiko kagahapon, Septiyembre 29, alas 11:47 sa buntag, sa posibleng masinati nga pat-ak-pat-ak nga pag-uwan ug panugdog ug kilat ingon man flash floods ug landslide nga makahatag og risgo.
Si Jhomer Eclarino, weather specialist sa Pagasa Mactan, nagkanayon nga dunay dala nga risgo ang kilat.
“Ang kilat is one of the hazards ng thunderstorm. Ang temperature ng kilat is taas kaayo mao nga if naigo sa kahoy, pwede masunog ang kahoy ug mag-apoy (mokalayo),” matod ni Eclarino.
Dugang niya nga kon dili molikay, dili lang ang pagkapaso ang maangkon apan moresulta usab kini sa kamatayon sa tawo.
Giawhag ni Eclarino ang publiko nga kon mabantayan ang baga nga dag-om, mangita og lugar nga kapasilungan.
Dili usab angay mopasilong sa taas nga lugar duol sa kahoy ug poles, dason ni Eclarino. Risgo usab kon magpaduol sa kadagatan o lugar nga dunay tubig.
Aron kalikayan ang pagdakop sa kilat, dili usab angay nga mogamit og gadgets o electronic device sama sa cell phone ug telepuno, dili mopaduol sa glass windows o glass doors ug ubang metal nga butang.