Sa makausa pa, nakadawat na usab og dakong grasya ang mga estudiyante ug mga Madre sa Sisters of Mary School Girlstown dihang gibisitahan na usab kini sa usa ka dakong negusyante nga may malumo og kasingkasing niadtong Huwebes, Septiyembre 29, 2022 sa ilang buhatan sa J.P. Rizal St., Pobacion, dakbayan sa Talisay.

Si Ronald Mascarinas, presidente sa Bounty Agro Ventures, Inc. (BAVI), uban sa Cebu Chooks ug Manila Chooks teams, nigahin gyud og igong panahon aron motunol sa P1.4 million nga hinabang pinansiyal alang sa sinagop nga mga kabataan.

Gawas niini, ang giilang godfather sa 3x3 basketball nisaad usab og mga sports equipment ug ingon man usa ka Chooks-to-Go meal alang sa 2,220 ka mga estudiyante sa maong tunghaan.

Niadtong 2019, ang Sisters of Mary maoy gihimong dapit diin giorganisar ang 3x3 basketball tournament nga nibuak sa world record nga pinakadaghang partisipante diin mikabat kini ngadto sa 3,043.

"Three years ago, nangako kami na babalik kami dito pero nangyari yung pandemic," matod ni Mascarinas kinsa mao usab ang presidente sa Chooks-to-Go. "Humihingi kami ng paumanhin at babawi kami sa inyo."

"Sa nakikita ko rito sa Sisters of Mary Girlstown, maganda ang kinabukasan ng ating bansa dahil sa inyo. Sana makatulong itong aming regalo sa inyo para sa operasyon ng Girlstown," dugang ni Mascariñas.

Ang Cebu Chooks team nga nahikuyog ni Mascarinas gilangkuban sa Sugboanong sila si Mac Tallo ug Zach Huang, Brandon Ramirez, Mike Harry Nzeusseu ug Vince Tolentino samtang ang Manila Chooks gibituonan usab nila ni playing coach Chico Lanete, Dennis Santos, Henry Iloka, Ken Holmqvist ug ang laing Sugboanon nga si Dave Ando.

Si Sister Laresa Morasa, ang school principal, mapasalamaton kaayo sa hugot ug tinud-anay nga suporta ni Mascarinas.

“Matagal namin kayong hinintay. Ang mga bata, madalas nagtatanong kung kelan babalik dito ang Chooks-to-Go. Nagpapasalamat kami sa Chooks-to-Go. Worth it ang paghihintay namin."

Subay niini, masaligon ang Cebu ug Manila Chooks teams nga makahatag og igong kombati sa FIBA 3x3 World Tour Cebu Masters, ang labing prestisyusong international basketball event nga gihimo dinhi sa Sugbo.

Ang torneyo ipahigayon sa SM Seaside City sa South Road Project (SRP), Mambaling, dakbayan sa Sugbo karong Oktubre 1-2, 2022. (JBM)