Sugdan na karong adlawa, Oktubre 1, 2022, ang labing dakong international basketball event sa Queen City of the South nga mao ang FIBA 3x3 World Tour Cebu Masters 2022 sa SM Seaside ning dakbayan sa Sugbo.
“We are bringing the biggest basketball event in Cebu,” matod ni Chooks-to-Go President Ronald Mascariñas atol sa official press conference sa torneyo sa miaging adlaw sa Radisson Blu.
Ning duha ka mga adlaw nga kompetisyon, ang Pilipinas representahan sa duha ka teams nga mao ang host Cebu Chooks ug Manila Chooks.
Ang Cebu Chooks pangulohan sa produkto sa Southwestern University (SWU) Cobras nga si Mark Jayven “Mac” Tallo, kinsa two-time MVP sa Cebu Schools Athletic Foundation Inc. (CESAFI).
Kauban ni Tallo ang sama niyang Sugboanon nga si Zach Huang lakip na sila si Brandon Ramirez, ug Mike Harry Nzeusseu.
Gipasabot ni Tallo nga grabe ang iyang kahinam nga mokombati sa torneyo gumikan kay dugay na siyang wala nakapakita og aksyon atubangan sa iyang mga katagilungsod.
“Sobrang excited ako. This is my first time to play in Cebu as a professional player. Binuhos ko talaga ang lahat sa training. Gustong-gusto naming manalo,” matod ni Tallo, kinsa kanhi magduduwa sa TNT Tropang Giga ug NLEX Road Warriors sa Philippine Basketball Association (PBA).
Sagubangon sa Cebu Chooks ang labing una nilang tahas karong alas 3:00 sa hapon batok sa Antwerp sa Belgium human sa opening ceremony nga nakatakda karong alas 2:35 sa hapon.
Sa ilang bahin, ang Manila Chooks pangulohan ni Chico Lanete, kinsa maoy head coach sa duha ka teams sa Pilipinas.
Kauban ni Lanete mao sila si Dennis Santos, Henry Iloka, ug ang laing Sugboanon nga si Dave Ando.
Sa labing unang kombati sa torneyo, ang Manila Chooks makigbatok sa Ludhiana sa India karong ala 1:00 sa hapon sa dili pa ang opening ceremony.
Mohamag sab sa kompetisyon mao ang Riga sa Latvia, Amsterdam sa Netherlands, Jeddah sa Saudi Arabia, Lausanne sa Switzerland, Sansar sa Mongolia, Omaha sa USA, Utsunomiya ug Saitama sa Japan, ug Doha sa Qatar.
Ang mokampyon sa torneyo makabulsa og $40,000.