Nibiya kagahapon, Septiyembre 30, 2022 ang delegado sa Lapu-Lapu City Performing Arts (LLCPA) nga gipangulohan ni Mayor Junard Chan ug Kongresista Cindi King-Chan paingon ngadto sa South Korea.
Ang LLCPA mosalmot sa Wonju Dynamic Carnival sa South Korea aron sa pagpakita sa kultura sa mga Oponganon lakip na ang pagpasundayag sa kasaysayan sa Kadaugan sa Mactan atubangan sa international audience.
Ang mga nag-unang karakter sa Kadaugan sa Mactan dumalahon ni Arnis de Abaniko, coach ug magtutudlo isip Datu Lapu-Lapu; Jasmin Chan, konsehal sa barangay Pajo nga nagdala sa karakter nga Reyna Bulakna; samtang si Tourism Commissioner – OIC John Kristoffer Rafols magsilbing Magellan.
Nasayran nga ang Wonju Dynamic Dance Carnival usa ka global festival sa S. Korea kansang pagpahigayon sa street parade tapuk-an sa bagang duot sa mga mananan-aw, lakip na ang guest participants gikan sa nagkadaiyang mga nasud.
Samtang duha ka mga siyudad sa Visayas ang gidapit sa maong festival nga mao ang Lapu-Lapu City Performing Arts ug Toledo City’s Joyful Tribe nga nagkampiyon sa miaging tuig sa Foreign Performance Group category.