Kahibalo ka ba kon unsay gidili kon gigutom o way sulod ang tiyan?

Matod sa akong paboritong mananambal nga si Dr. Willie Ong, kining mosunod ang angay likayan kon way sulod ang tiyan o gigutom:

Dunay mga tambal nga angay imnon kon busog na o may sulod na ang tiyan sama sa pain relievers, ibuprofen, mefenamic acid, aspirin, steroids kay gawas nga hapdos kini, posibling makagasgas o samad sa tiyan maong magdugo.

Gidili sab ang pag-inom og ilimnong makahubog sama sa bino ug uban pang dunay alcohol kay gawas nga dali kining makapahubog, mosagol sab dayon kini sa dugo nga mokatay sa atong kaugatan paingon sa atay ug ulo.

Sunod kining mga aslom nga prutas sama sa citrus (orange, lemonsito) kay ang atong tiyan acidic na daan maong kuyaw masubraan.

Ikaupat kining mga siling halang o spicy foods kay seguradong makasakit ug makapahapdos kini sa tiyan.

Ikalima, kining kinalit ug diretsong hamal og kaon kay delikadong di mahilisan unya mokalit sab og saka ang kamay sa lawas.

Sugyot ni Dr. Ong, kon way sulod ang tiyan, ayaw dayon pakaliti og sulod, hinayhinayi lang og sa English pa, small but frequent feeding aron di masuka ang kinaon.

Di sab maayo maghimo og desisyon kon gigutom kay seguradong bati ug sayopsayop ang resulta ini. Gani ang uban nga gigutom magkurog unya malukop og habhab bisag unsang pagkaon ang makita.

Sunod, kining mga fully carbonated nga ilimnon sama sa softdrinks nga magbula-bula. Kuyaw nga makalitan imong gutom nga tiyan unya magpunay na hinuon ka og panug-ab kay taas man sab gud ni og acid.

Unsa may angay hinuong imnon o kan-on kon gigutom?

Init-init nga tubig imbis bugnaw o ba kaha tea. Pwede sab mansanas, pakwan, mani, init nga sabaw, ug itlog.

Hinumdomi, aron di makalitan imong tiyan, hinayhinay lang sa pagkaon kay kon hinay ka nga mo kaon, dali sab kining mahilis unya maka slim pa gyod.

Ang atong tiyan mogaling sa pagkaon sulod sa 15 minutos una ka ma busog.