Risgo sa kinabuhi. Nag-ungaw sa kamatayon ang tahas sa usa ka responder o sakop sa rescue team sa matag lokal nga kagamhanan ug mga pribadong organisasyon sa pagtubag sa emerhensiya, labi na mugna sa lihok sa kinaiyahan nga dili mapugngan sa tawhanong pwersa.
Bisan kaluha na kini sa ilang trabaho, makaluluoy usab nga pamalandungon labi na kon haligi o bread winner sa pamilya. Dakong epekto ang ilang pagtaliwan sama sa lima ka mga rescuer sa lalawigan sa Bulacan atol sa pag-igo sa bagyong Karding niadtong Lunes, Septiyembre 26, 2022.
Tungod niini, dalaygon kaayo ang hukom sa dakbayan sa Naga sa paghatag og financial assistance sa pamilya sa lima ka rescuers sa Bulacan Provincial Disaster Risk Reduction and Management Office (BPDRRMO) nga nangamatay atol sa pagsanong sa ilang tahas atol sa emerhensiya.
Si Mayor Valdemar Chiong sa Naga nga gikutlo sa taho sa Superbalita Cebu sa Huwebes, Septiyembre 29, 2022, niingon nga pundo sa ilang disaster management office maoy kuhaan alang sa pinansiyal nga hinabang sa pamilya ug maisip usab nga balos sa kaayo sa kagamhanan sa Bulacan.
Nasayran sa mayor nga duha sa lima nga namatay nga sakop sa BPDRRMO gipadala niadto sa dakbayan sa Naga, Cebu sa pag-abag sa rescue operations sa landslide sa Barangay Tinaan sa 2018. Daghang nakalas nga kinabuhi ug dakong kadaut sa mga kabtangan sa komunidad.
Bisan wala gibutyag sa mayor ang kantidad sa pinansiyal nga hinabang, apan seguradong makatabang kini sa paghupay sa nagbangotan nga pamilya sa lima ka mga rescuer sa Bulacan.
Dili nato matagna ang panahon. Importante ang pagtinabangay sa pagpagaan sa giatubang nga problema sa ubang lokal nga kagamhanan, nasod o bisan ngadto sa indibiduwal.
Wa kita masayod nga kita na usab ang nanginahanglan og tabang sa umaabot.