MIHIMO na og lakang ang Awao National High School didto sa Awao, Monkayo, Davao de Oro human nga dunay tulo ka mga estudyante niini nga naaksidente sa ilang gihimo nga water cycle science experiment sud sa ilang laboratory sa eskuwelahan Huwebes, Septyembre 29, 2022.

Sa hulagway nga gi-post sa netizen nga si Marvin Pusta, nakahiagom og mga paso sa lawas ang tulo ka mga tinun-an.

Sa report sa dxDC RMN Davao, sumala sa principal sa maong tulunghaan, dunay material nga gidakop sa kalayo ug mikanit sa ubang materyales nga miresulta sa pagkaangol sa tulo ka mga estudyante.

Hinuon, anaa na sa luwas nga kondisyon ang mga nahisgutan.

Panawagan sa pipila ka mga netizens nga dili mahayon ang mga magtutudlo nga maoy in-charge sa maong klase gumikan sila sab kuno nagkat-on sa maong matang sa eksperimento ug aksidente gayod ang nahitabo. (Uban sa taho sa dxDC RMN Davao)