BUAK ang bagol-bagol sa sundalo nga gipusil sa off-duty nga pulis alas 6:25 sa gabii, Huwebes, Septyembre 29, 2022, sa Pikit, Cotabato Province.
Giila ang biktima nga si Sergeant Roy Degamo nga nadestino sa Military Intelligence Group (MIG)-Soccsksargen, lumad nga taga Alabel, Sarangani Province, apan kasamtangan nga nagpuyo sa Carmen sa nahisgutang probinsiya.
Base sa spot report sa militar nga gipusil ang biktima sa pulis nga si Police Staff Sergeant Chris Paul Aninon Baldo, 35, nadestino sa Midsayap Municipal Police Station ug nagpuyo sa Barangay Dalingaoen sa Pikit.
Nasayran nga nibisita ug nakig-inom si Degamo sa ka-batch niini nga sundalo sa Barangay Dalingaoen.
Apan wala madugay, ang sundalo miadto sa sari sari store duol sa giimnan nila nga balay sa iyang kauban aron mopalit og sigarilyo.
Sa dihang nasiplatan si Degamo sa tag-iya sa tindahan nga dunay dala nga pusil, gitawag niini ang anak nga pulis nga si Baldo ug didto natigayon ang pagpamusil.
Apan base sa taho sa Pikit Municipal Police Station nga gisita ni Baldo si Degamo apan kalit kining mihulbot sa iyang pusil hinungdan nga giunhan sa pulis gamit ang Glock 9mm pistol.
Patay on the spot ang sundalo nga naigo sa ulo ug ulahi na nga nasayran nga sakop kini MIG-Soccsksargen.
Nagpadayon ang imbestigasyon sa kapulisan sa Pikit Municipal Police Station sa maong hitabo.