Ang maayong mithi sa usa ka lider mao ang kanunay nga paglantaw sa kaayuhan sa iyang mga ginsakupan ug katawhan. Kanunay kini niyang prayoridad.

Usa sa dakong suliran sa yanong mga tawo mao ang pagpalit og tambal kon sila masakit. Busa, si San Roque Barangay Captain Virginia Abenoja nagbutang og Botika sa Barangay, diin tanang mga tambal libre alang sa iyang mga konstituwente nga dunay gipamati sa lawas.

Kon wa man sila sa tambal nga gikinahanglan niini, ang barangay na ang mopalit hangtod sa P2,000 nga balor.

Gipakita ni Abenoja nga usa siya ka inahan nga kanunay naglantaw sa kaayuhan sa mga lumolupyo sa San Roque.

Ang Brgy. San Roque nahimutang sa kinapusoran sa siyudad sa Sugbo busa di kaayo layo ug di lisod ang pag-adto og tambalanan kon dunay emerhensiya.

Apan bisan pa niini, aron di maglisod ang mga lumolupyo sa pagsakay kon dunay emerhensiya, ang barangay nanag-iya og ambulansya.

CCTV

Naandan na sa publiko nga mahadlok nga mosuroy o maglakawlakaw sa mga urban barangay, sama sa San Roque.

Dali kaayong masulod sa huna-huna ang mga krimen, sama sa tulis, snatching ug uban pa. Apan si Abenoja niseguro nga luwas ang iyang barangay ni bisan kinsa nga gustong moduaw tungod sa kadaghan sa ilang gipangmontar nga closed circuit television (CCTV) sa kadalanan.

Tuig 2021, nag-install og 50 ka mga CCTV camera sa matag ginsakupan niini nga karsada ug sitio sa barangay.

Apan, 37 ang operational lang sa mga CCTV tungod kay gi-schedule nga ilisan ang mga naguba nga camera human sa Bagyong Odette sa Disyembre sa milabay nga tuig.

Dugang ni Abenoja, gigastuhan kini sa barangay og P7 milyunes nga gipundohan pinaagi sa financial subsidy gikan sa City Government.

Sayud ang opisyal nga daghan ang mahadlok nga moagi sa ilahang mga kalsada, busa pinaagi sa ilahang CCTV ug mga personnel nga kanunay nag-monitor, mas paspas sila makaresponde sa bisan unsa nga hitabo.

Nahimutang sa dapit sa mga pantalan sa dakbayan, naneguro si Abenoja sa seguridad dili lang sa ilahang konstituwente kundi apil na sa mga tawo nga moadto og pantalan.

“Kahibawo ka ang Barangay San Roque before, bisan og katung moagi diri kay kuyawan na, makaingon gayud nga dili ta mangagi diri kay mao ni, mao na,” asoy ni Abenoja.

Busa, pinaagi sa mga CCTV, ilang napahugtan ang seguridad sa barangay sud sa 24 oras sa tibuok semana.

“Karon, daku kaayo ang kalainan kay monitor man namo tanan. Kon naay mga kawat-kawat,ma-monitor gyud namo siya, ma-trace gyud namo,” paneguro sa opisyal.

Nilingkod sa pagka-kapitan si Abenoja niadtong 2018, hulip sa iyahang bana nga anaa na sa ikatulo ug katapusang ng termino.

PROYEKTO

Natukod usab sa iyahang panahon ang tulo ka andana nga building extension sa barangay hall busa mas nidaghan pang mga konstituwente nga ilang natabangan ug naserbisyuhan.

Gigastuhan og P3.5 milyunes ang maong edipisyo nga adunay rooftop kon asa ipahigayon ang programa nga “Zumba session” ug uban pang mga kalihukan sa barangay.

Aron daghan pang matabangan, nipalit ang barangay og mga sakyanan ug mga ekipo sama sa ambulansiya, fire truck, patrol car, ug bus.

Nagplano si Abenoja sa pagtaud og solar lamps sa kadalanan, pagpaayo sa ilang gym ug pagpalambo sa drainage system.