Ang Cebu City Department of Veterinary Medicine and Fisheries (DVMF) nidasig sa mga tag-iya og binuhi nga mga hayop nga butangan og microchips ang ilang mga iro ug iring alang sa tracking ug mopasayon sa ilang biyahe sa abroad.
Si DVMF head Dr. Jessica Maribojoc nisulti sa SunStar Cebu sa Biyernes, Septiyembre 30, 2022, nga 2,000 na ka binuhing hayop gi-tagged og radio frequency identification (RFID) microchip sukad sa 2013.
Matod ni Maribojoc nga pinaagi ning mao nga teknolohiya, ang mga hayop nga nawala sayon rang mahiuli sa ilang tag-iya pinaagi sa RFID scan.
Interesadong mga tag-iya mahimo lang mobayad og P600 nga “perpetual registration” nga maglakip sa mga bakuna, vitamins ug microchip tagging, siya nidugang.
“Ang microchip is lifetime identification sa pet nga dili gyud makuha, radio frequency ni siya and then i-embed sa atoang dog,” matod ni Maribojoc.