Kapulisan sa siyudad sa Sugbo walay kasayuran nga duna nay napilian si Cebu City Mayor Michael Rama nga ihulip sa kasamtangan nga pangulo sa Cebu City Police Office nga si Police Colonel Ernesto Salvador Tagle.
Gianunsyo ni Rama atol sa programa ni manlalaban Ruphil Fernandez Bañoc sa sibyaanang dyHP nga aduna na siyay napilian nga mahimong sunod nga CCPO director.
Si Rama niangkon nga iyang gipili si Police Colonel Ireneo Dalogdog, kasamtangang hepe sa Criminal Investigation and Detection Group Regional Field Unit 7.
Matod ni Rama nga nagpaabot siya sa bag-ong molingkod nga hepe sa CCPO .
“I’m waiting now for the new chief of police. I have already a recommendation. I had to call them where is my chief of police? New one, ako na nang... I went into the process....Kon mangutana sila kon kinsa? Dalodog, taga Bohol, Bisaya,” matod ni Rama.
Nanghinaot siya nga dunggon sa Camp Crame ang iyang gipili nga mao gyud ang itudlo nga hepe sa kapulisan sa siyudad sa Sugbo.
Matod ni Police Lieutenant Colonel Wilbert Parilla, deputy city director for administration sa CCPO, nga confidential ang pagpili sa mayor ug siya lang ang nasayod kon kinsa ang iyang gusto nga mangulo sa kapulisan.
Katungod kini sa mayor kon kinsa ang iyang napilian.
“So far, wala man tay nahibaw-an ani with regards sa mga request. Confidential man na siya between the higher headquarters and the chief executive. But that is the prerogative of the chief executive,” matod ni Parilla.
Sa naandan, ang Camp Crame mopadala og lima ka mga ngalan sa buhatan sa mayor sa usa ka lokalidad nga maoy iyang pilian nga maoy mangulo sa kapulisan, apil na niini ang officer-in-charge.
Kon duna nay nagustohan ang mayor nga irekomendar, ibalik kini ngadto sa Camp Crame aron tukion sa Senior Officers Placement and Promotion Board una pa himoan og order sa pagdestino sa napilian sa mayor.