Aduna ka bay motorsiklo o sakyanan ug gusto kang moagi sugod karong adlawa sa Cebu-Cordova Link Expressway (CCLEX) apan wala ka pay radio frequency identification (RFID)?
Dili kana problema sanglit ang management sa CCLEX nihatag og kahigayunan nga makapataod pa og RFID ang libuan ka mga motorista sugod karong adlawa sanglit ilang ipadayon ang dry run.
Si Allan Go Alfon, presidente ug general manager sa Cebu-Cordova Link Expressway Corporation (CCLEC), nagkanayon nga naminaw sila sa panawagan sa kinabag-an hinungdan nga ilang nahukman nga iuswag sa wala pa matino nga petsa ang pagsugod sa full implementation sa RFID.
“Because of clamor, calls, requests from motorists all over, we decided late yesterday to extend the ongoing dry run that started September 1 and supposedly end tomorrow October 1,” padayag ni Afon.
“You have to be customer intimate and because of the requests of various motorists, then we decided to extend the full implementation of RFID. As to when, we still don’t know,” dugang ni Alfon.
Apan iyang gipadayag nga sa mosunod nga mga adlaw, ilang ipahibawo kanus-a mahuman ang lugway sa ilang dry run diin sa kasamtangan, adunay usa ka lane alang sa four-wheeled nga mga sakyanan ug laing lane alang sa mga motorsiklo, kinsa mobayad og cash samtang ang laing duha ka lanes alang sa aduna nay RFID.
Si Mareon Therese Miole, operations manager sa CCLEC, nagkanayon nga moabot na sa 90,000 ka mga sakyanan, 20 porsiyento niini motorsiklo, nga aduna nay RFID ug 40 porsiyento niagi na sa CCLEX.
Sa CCLEC, aduna pay kapin o kulang 110,000 ka RFID nga giandam alang sa pagdagsa na unya sa mga motorista nga magpataod og sticker aron sila makaagi sa CCLEX sa higayon nga dili na dawaton ang cash sa ilang toll gate.
Ang labing dako nga opisyal sa CCLEC nagkanayon nga posible sa sunod nga mga buwan, ang RFID sa CCLEX magamit na ngadto sa ubang expressway nga gidumala sa Metro Pacific Tollways Corporation (MPTC) sa Luzon ug vice versa.
Ang pagtaod sa RFID padayon nga gihimong libre sa CCLEC para sa mga motorista hangtod nga ang tanang gusto ug adunay plano moagi sa CCLEX makabaton sa maong sticker.
Gipahibawo ni Alfon nga adunay kapin o kulang 8,000 ka mga sakyanan o motorsiklo ang moagi sa CCLEX matag adlaw ug moabot sa 12,000 sa Sabado ug Dominggo.
Gipadayag usab ni Alfon nga ang lungsod sa Cordova ug Siyudad sa Sugbo adunay tag 1 porsiyento nga bahin sa kinatibuk-ang kita sa CCLEC.
Iyang gitug-an nga wala pa sila nakahatag sa duha ka mga local government sanglit nagpadayon pa sila sa dry run, apan iyang gipahibawo nga ila na kining gi-audit ug aduna na silay pundo nga giandam.