Sugod karong buntag, Oktubre 1, 2022, manggawas ang daghang mga pulis sa dakbayan sa Sugbo aron moduyog sa mga kawani sa Cebu City hall uban sa mga opisyal sa barangay, sa pagpatuman sa Oplan Disiplina.
Matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO) nga magsugod sa kabarangayan ngadto sa dagkong mga establisemento ang pagpatuman.
Tanang mga ordinansa ug nasudnong balaod ilang ipatuman sama sa illegal parking sa kadalanan, ma motor man o four-wheeled nga mga sakyanan, pagpataka’g labay sa mga basura, pangluwa, pagpanabako sa publikong lugar ug uban pa.
Dunay ordinansa ang Siyudad nga hugot nga nagdili sa parking sa daplin sa karsada ilabi na sa mga sudlonong bahin sanglit peligro kon adunay kalamidad sama sa sunog ug uban pa.
“Ang atong approach ani it will be the same during sa Covid Oplan Bulabog. This will be bottoms up approach, so it will start in the barangay going diri sa main thoroughfare sa mga dakong establishment,” matod ni Parilla.
Napanglantawan sa kapulisan nga ang Oplan Disiplina sibo sa ilang anti criminality campaign sanglit duna na may mosuroy nga mga pulis ug mga kawani sa city hall uban ang Bureau of Fire Protection sa tanang mga dapit.
Mapugngan usab ang pag-igo sa kalamidad kon ang tanang mga tawo mosunod sa balaod tungod kay mawagtang na ang mga basura nga usa sa mga hinungdan sa pagkabara sa dagkong mga kanal.
Giangkon ni Parilla nga dakong hagit kanila ang pagpadayon sa Oplan Disiplina sanglit ilang nakita nga ang mga tigpatuman lang ang bantayan sa mga tawo. Kon wala na, mobalik na usab sa paglabay.
Dunay giumol nga team ang Kagamhanan sa Siyudad sa Sugbo nga maoy mopadayon. Kini mao ang Prevention, Restoration, Order, Beautification and Enhancement (Probe) team, Cebu Environmental Sanitation and Enforcement Team (Ceset), Cebu City Transportation Office (CCTO), BFP ug kapulisan.
Kadtong maabtan nga nilapas sa ordinansa isyuhan og citation ticket ug pamultahon sa salaod.
Awhag ni Parilla sa publiko nga kining panahona magtinabangay ang tanan pinaagi sa pagdisiplina sa kaugalingon aron makab-ot ang tinguha nga masusama sa Singapore ang siyudad sa Sugbo. /