Pipila ka mga semana na ang nakalabay, nag-estorya mi sa akong kanhi kauban sa Superbalita Cebu ug karon pangu sa City of Talisay Traffic Operations and Development Authority (CT-TODA) Jonathan “Joy” Tumulak kabahin sa pagbutang og motorcycle lane nga magsumpay sa Talisay, Cebu City ug Mandaue.
Karon, ang Cebu City Transportation Office (CCTO) naghisgot na kabahin niini. Sa akong paminaw sa estorya ni Joy, it’s a matter of time na lang ang gipaabot sa pagpatuman niini.
Apan makapabalaka kay ang motorsiklo ug biseklita itipon lang sa usa ka lane. Kon di palapdan ang kasamtangang bike lanes karon, dako ang kahigayunan sa mga disgrasya. Maorag dehado ang mga tig bike ani kon mahinayon man kay kon mag inig-anay, mas daling matumba ang biseklita tungod sa kagaan.
Hinaut nga ilang palapdan ang lanes kay gamay ra kaayo ang kalapdon sa bike lanes karon. Daghan ra ba kaayong kaskasero nga mopadagan sa mga nagmotorsiklo. Unya i-confine sa usa ka lane sa karsada, ambot unsa kahay mahitabo. Di kaha magkarambola?
KATARUNGAN
Nahuna-hunaan kini sa mga traffic official sa tulo ka mga siyudad tungod sa mga disgrasya nga naglambigit sa mga motorsiklo. Nangaangin lang intawon ang mga nagbiseklita tungod sa kadaghan sa iresponsabling mga tigmotorsiklo.
Nakaingon ko niini tungod kay tigmotorsiklo mi kada adlaw sa akong asawa. Kadaghan na gyud nga dunay mga nagmotor nga bisan huot na kaayo sa karsada mosuway pa sa paglusot. Kana gyung patung-an ka og duha nga nagmotorsiklo samtang nag-aginod ka sa trapiko, kuyaw kaayo sa panagpingki.
Sa panahon ni Joy sa CCTO kaniadto, kanang 20 ka disgrasya sa motorsiklo di na imposible. Wa pa ko nakalimot dihang usa ka adlaw sa Gov. M. Cuenco Avenue nga mas nailang Bantal Road, lima ka mga disgrasya sa motorsiklo ang akoang naagian.
Diha say ka usa nga kusog kaayong nakapadagan ang motorsiklo dihang nikalit og brake ang nag-unang sakyanan, aw nabangga sa likod sa four-wheeled nga sakyanan. Nikupo-kupo ang nagmotor kay nabali ang usa ka tiil.
Sa University of San Carlos-TC naunhan pa ko niya but naapsan ra nako siya sa may Country Club ug nakasaksi ko sa pagkabangga.
DI MABASOL
Busa, di mabasol ang mga traffic official nga nakahuna-huna niini kay duna may basehanan. Wa lang ni niturok sa ilang mga huna-huna nga traffic strategy. Gibase ni sa hard data.
Apan hinaut unta nga sa ilang pagpatuman niini, sa ako nang giingon, seguruon nga palapdan ang mga bike lane karon. Kay kuyaw kaayo kon di ni palapdan, posibleng managhan pa hinuon og maayo ang mga aksidente sa motorsiklo.
Instead nga ang tumong niini mao ang paghimo sa karsada nga luwas, mao na hinuon kini ang hinungdan sa mga disgrasya.