Daghan na kaayo og balaud sa trapiko nga gilapas kay wa man sab gipatuman sa mga awtoridad. Dunay mga probisyon sa Land Transportation and Traffic Code nga gikalimtan na lang.
Kon higpit nga ipatuman ang uban pang mga balaud, daghan sa mga sakyanan sa kadalanan ang maglisod og pasar, labina sa mga daan. Daghan pang mga kalapasan sa Traffic Code nga wa lang napatuman.
Bisan gani sa Anti-Distracted Driving Act of 2016, daghan ang nakalapas niini. Tan-awa ra gud nang mga nagmotorsiklo, nagbutang og mga cell phone sa atubangan aron masubay ang ilang destinasyon.
Gipasar kini nga mga balaud alang sa kaluwasan, kahusay ug kahapsay sa karsada, apan makapaguol kay daghan ang yano rang gilapas.
Busa, tungason kaayo ang tahas ni Cebu City Mayor Michael Rama nga Singapore-like nga siyudad kay bisan lang gani sa balaud sa trapiko, ang pagpatuman niining tanan malisod kaayo.
Unya, mabantayan ba sab kaha ang magpataka og pangluwa, magpataka og labay og basura ug lapad nga paglapas sa balaud sa trapiko?
Mahawanan kaha sa tanang mga estruktura ang kasapaan ug uban pang dagkong mga agianan sa tubig? Di kaha modangop sa hukmanan ang ubang mga hingtungdan, labina ang mga negusyante nga apektado?
Sulod sa daghang katuigan lugak kaayo ang mga awtoridad sa pagpatuman sa mga balaud nga napanday na. Daghan na ang nangaanad sa paglapas busa, kon badlungon na, daghan ang mosuki ug dautan na ang mga tigpatuman. Kay gipasagdan, ang sayop gihimo nang sakto.
Busa, si Rama makapaabot nga sa iyang higpit nga pagpatuman sa mga balaud daghan ang mosuki ug mosukol. Naa say uban nga cat and mouse. Kon way awtoridad, molapas.
Sama sa usa ka driver nga gisita sa enforcer nganong nilabang siya sa pikas eskina nga unta, naka red ang traffic light. “Wa man ko kakita nimo, Sir, nga naa diay ka sa atbang.”