Mga lumolupyo sa Isla sa Olango, dakbayan sa Lapu-Lapu dili na mapugos pagpangita og internet connection sa mga dapit sa baybayon sa higayon nga matukod na ang cell tower sa isla.
Giaprobahan sa Konseho sa Dakbayan sa Lapu-Lapu atol sa ilang regular session sa Miyerkules, Septiyembre 28, 2022, ang resolusyon nga gipangamahanan ni Konsehal Marciano Alforque Jr., nga nag-apelar kang Mayor Junard “Ahong” Chan nga mohangyo ug makigsabot sa Philippine Long Distance Company (PLDT) aron i-install ang submarine fiber optic cable line gikan sa Mainland ngadto sa Olango Island.
Sa iyang resolusyon, gitataw ni Alforque nga pipila ka mga residente sa Olango Island ang napugos pagpangita og internet connection sa mga shoreline area nga nag-atubang sa mainland Cebu o sa Mactan Island sanglit ang mga cell tower sa nahisgutang mga lugar usahay makaabot sa ilang baybayon.
“The Lapu-Lapu City Government needs to provide communication facility and internet connectivity to the Island of Olango by installing the submarine fiber optic cable line and establishing a cell tower thereon, serving its, more or less, 42,000 residents,” matod ni Alforque aron mahatod ang broadband services sa kabalayan nga mas paspas.
“This representation is of the knowledge that PLDT is currently embarking on a nationwide expansion and upgrading of its telecommunications facilities in order to bring our country at par with international standards in terms of internet connectivity,” dugang niya.
Gihimug-atan ni Alforque nga ang Olango Island kinahanglang dili pasagdan ug kinahanglang maapil sa pag-uswag sa teknolohiya o modernisasyon sa PLDT, nga iyang gitumbok nga usa sa mga nag-unang kompaniya sa telekomunikasyon ug labing dako nga kompaniya sa Pilipinas.
Ang konsehal niingon nga ang kompaniya sa PLDT maoy mobutang sa submarine fiber optic cable line sa ilang kaugalingong gasto samtang ang partisipasyon sa Kagamhanan sa Dakbayan mao ang paghatag og business permit atol sa operasyon.
Ang nahisgutang kompaniya hangyuon usab nga mosumiter sa ilang mga plan lay-outs, engineering designs ug ang specific designated area alang sa pagbutang sa submarine fiber optic cable line ngadto sa City Engineering Office, City Planning and Development Office.